Skirbi pa Arturo Desimone y Luis Anibal Villegas Hernandez. 

Na Aruba y otro paisnan anteriormente di Antias, semper tabatin e debate conoci na tur isla di Caribe y na tur pais Suramericano, mas cu shen y nobenta aña despues di morto di Bolivar. Esaki ta e cuestion di independencia of dependencia.

Den e situacion excepcional di islanan chikito manera Aruba, e factornan di mayor consideracion ta siguiente: tin recurso natural escaso, tiki industria, y un poblacion limita riba tereno chikito. E factornan aki nos no ta comparti cu paisnan enorme manera Colombia, Bolivia, Brasil, entre otro, cu nan pueblo numeroso y geografia extenso. Nan tin problema completamente otro: di exporta masha hopi producto y materia prima (recursonan manera metal y cuminda) afo. E unico manera cu islanan chikito por acerca un ideal historico comparabel cu autonomia, ta a traves di mantene un interdependencia: den forma di integracion regional. Esaki solamente por wordo logra si islanan manera Aruba mantene relacionnan saludabel cu paisnan bisiña. Instabilidad na Venezuela y na Brasil ta impacta Aruba cu Corsou, haciendo nos mas dependiente riba prestamo Hulandes y turismo di Merca. Awendia e prestamonan Hulandes ta sigui un semehante modelo cu Fondo Monetario Internacional ta ofrece paisnan subdesaroya: hopi condicionnan pidiendo recorte streng, castigo y austeridad, y interes skerpi riba fiamento.

Tin un idea cliché cu a wordo popularisa recientemente: cu hopi biaha solucionnan pa problemanan dificil ta mas scondi ainda, ora cu nan para nos dilanti– ora nan ta obvio, casi natural, nos no por reconoce nan, y asina nos ta fracasa. E obviedad di un solucion por scond’e, contradictoriamente. Esaki ta bin di filosofia oriental. Sinembargo e ta aplicabel pa Aruba.

Hotelnan, cu nan presencia gigantesco rib’e isla, ta paga impuesto hopi mas abao cu e 25% di impuesto cu otro companianan regular ta paga na Aruba. Pio ainda ta cu e hotelnan por paga menos cu e standard internacional di impuesto (10%) pa reinversion den un pais. Esaki ta segun e World Wide Corporate Tax Guide, cu e compania Ernst & Young a publica den 2021. Segun un construccion den ley Arubiano (Landsverordening winstbelasting), hotel ta cualifica manera Special Purpose Companies (SPCs,) despues di legislacion di 2021, y por paga entre 10 y 15 % na impuesto di compania (vennootschapsbelasting, corporate tax). Un descuento formidabel durante un tempo di crisis y peliger pa autonomia. E descuento pa companianan multinacional aki ta un continuacion di e relacion historico entre autonomia politico y dependencia riba industria hotelero grandi.

Bayendo 18 aña atras por observa con minister di finanzas Nilo Swaen a djis pretende di kita e construccion di ‘Tax Holiday’, cual tabata sigura cu entre otro proyectonan hotelero por wordo desaroya sin mester paga varios impuesto. Cu e Tax Holiday hotelnan por a pidi minister un decreto nacional (landsbesluit) unda ta excusa nan di paga impuesto y gastonan pa cuminsa e empresa. Bao esaki tabata cay entre otro importacion di material pa construccion y di prome mueblacion, y importantemente impuestonan riba ganashi (winst- en dividendbelasting). Swaen, vulgarizando e legado politico di Juancho Yrausquin y di Betico Croes, a ofrece un gesto di gratitud na e cadenanan hotelero pa nan “contribucion na e exito economico di Status Aparte” por medio di laga nan mantene nan Tax Holiday (maske e beneficio a wordo para (AB 2002, nr. 124). Dicon Swaen a pretende? Pasobra el a kita hasta e tiki impuesto di 2% pa 0% pa e hotelnan, cu efecto retroactivo bayendo back te 1 di januari 1986, dia cu Aruba a haya Status Aparte.

Den pasado paisnan Latino Americano a lucha pa nan autonomia politico y economico. Esaki tambe tabata e caso pa Aruba, cu a mira cu e unico manera pa autonomia tabata via prosperidad y un identidad politico. Pero awendia, e debate tocante auto-gobernacion y deuda na Aruba ta mas unidimensional: el a bira un combersacion estrictamente limita na temanan financiero y administrativo. Si hotel paga mas, Aruba no mester sacrifica autonomia pa scapa deuda. Asina ta percura pa no cay atrobe bao maneho di organisacionnan neocolonial manera Fondo Monetario Internacional cu ta preveni hopi pais di Sur mundial por crece awendia. Gruponan manera COHO cu CAFT ta aplica modelonan similar, operando den Caribe mescos versionnan miniatura di e IMF. Un ehempel memorabel: memey di un pandemia CAft a exigi corta 60 miyon den Salud Publico.

Arubiano tin mas cu mey siglo ta traha den horeca. Esaki ta for di tempo cu Yrausquin tabatin un vision, di no solamente fomenta industria turistico na Aruba, pero tambe avansa un programa pa re-distribui rikesa dje mesun industria. Den forma di bon salario, pension, seguridad y derecho laboral. Prijsnan na Aruba awendia pa cualkier actividad social ta unicamente prijsnan turistico. Arubiano a sacrifica asina hopi rib’e altar di hospitalidad, y di produci experiencia di placer pa turista. Ta inhusto cu awor nan mester ta testigo, con nan esfuerso enorme no ta wordo debolbi na nivel nacional pa salb’e isla y su fragil semi-independencia– fo’i dje menasa di un fiado cu a perde tur pasenshi.