Manera ta conoci, algun tempo atras, a instala un ekipo multidisciplinario cu ta preparando tur e trabounan preliminario, manera documentonan y plannan strategico, pa e momento cu bay inicia cu e negociacionnan pa cu reapertura di frontera cu Venezuela. Adicionalmente, a reuni tambe cu directie scheepvaart y directie luchtvaart caminda e havenmeester mes a duna un splicacion amplio di con e trabounan mester wordo prepara prome cu por haci e reapertura.
Minister di Husticia y Asuntonan Social Sr. Rocco Tjon, a indica cu durante e reunion aki a haci palabracionnan concreto, caminda otro siman lo ricibi e otro dos consehonan di e otro dos gruponan cu ta atende cu e tematica aki. E prome grupo lo enfoca solamente riba e parti operacional, tin diferente modelonan cu nan ta uza cu lo mester ta operacional prome cu nos por incia cu e reapertura na un forma gradual. Di otro banda, e otro grupo lo enfoca riba e parti huridico, pues e maneho di visum y con ful e parti aki lo mester ta hinca den otro, prome cu por inicia cu e negociacionnan.
Manera a menciona, otro siman lo ricibi ambos conseho, cual lo wordo presenta na conseho di minister, pa asina un decision por wordo tuma, pa e negociacionnan por cuminsa tuma luga. Ya caba, e decicion a cay, cu fin di luna e grupo lo cuminsa cu e reunionnan aki cu nan counterpartners di Venezuela tambe. Pues e asina yama “technisch overleg” lo inicia, pa asina nos por wak un “liña di tempo” realistico cu tur e puntonan por ta operacional, prome cu por pasa na un reapertura di frontera cu Venezuela na un forma gradual.
Den un comunicado di gobierno dia 13 di januari ultimo, a indica cu “e situacion rond di e apertura di frontera cu Venezuela ta mescos cu di lunanan anterior. Actualmente ta den espera pa sinta na mesa cu Venezuela pa por cuminsa cu deliberacion. Ya ta hibando combersacion di esaki pero e negociacionnan no a inicia ainda.” Despues di un reunion bilateral cu minister Wopke Hoekstra di Hulanda na october di aña pasa, Prome Minister Wever-Croes a duna di conoce cu Hulanda y Aruba ta riba mesun liña pa locual ta trata e tema di Venezuela. Ademas Prome Minister a remarca cu lo sigui traha pa purba yega na reapertura di e frontera, y pa yega na esey mester haci palabracionnan y condicionnan concreto cu Venezuela. Lo desea pa tin e mesun palabracionnan cu tabatin entre Aruba y Venezuela na 2018, sinembargo aworaki no tin ningun contacto entre autoridadnan di Aruba y Venezuela, pues asina e frontera no por habri.
