Minister di Energia, Labor y Integracion a yega for di Ecuador varios dia pasa, unda e ta continua cu e buskeda di un solucion pa por reduci prijsnan di awa y coriente, cumprando Heavy Fuel Oil (HFO) conforme exigencianan y specificacion di WEB pero na un prijs mas accesibel.
For di october di aña pasa, a bin dilanti algun puntonan como cu a surgi e proposicion pa Flotas Petroleras de Ecuador esta FLOPEC, usa Aruba como su hub pa su flota, pa almacena su producto den e tankinan di RDA y pa distribui esaki for di Aruba. E actividadnan aki ademas di genera entrada pa RDA/FMSA, lo genera trabou tambe.
Diaranson ultimo riba su website, Minister Croes ta enfatisa cu “reunionnan cu PetroEcuador referente RDA N.V y FMSA ta avansando. Den cuadro di nos esfuerso pa baha prijs di awa y coriente pa nos pueblo pa por logra e compra di HFO segun specificacion di WEB na un miho prijs y mas barata, awe mi a reuni cu PetroEcuador su Gerente di Comercio Internacional Reinaldo Armijos, y tambe nos a continua e deliberacion pa un relacion strategico entre RDA y PetroEcuador. Mañan nos esfuersonan na Ecuador ta continua”.
Igualmente, un biaha mas el a reuni cu FLOPEC su director comercial, Gonzalo Rueda, pa sigui papia tocante e acuerdonan aki, na unda e ta bay amplia mas informacion riba esaki e dia di awe den un conferencia di prensa 10or di mainta.
