Tur aña Minister Maduro ta reuni cu ehecutivonan di Standard & Poor’s (S&P) riba e evaluacion di nos Pais su situacion financiero y economico. E siman pasa a toca turno na e mandatario pa hunto cu Minister President reuni cu S&P, despues cu S&P a reuni cu diferente departamento di Gobierno y instancia, pa asina por haya un bista con Aruba ta para financieramente y economicamente.
Durante e reunion Minister Maduro y Minister President a brinda informacion riba, entre otro, e trabounan cu ta tumando luga den cuadro di e Landspakket acorda cu Hulanda, e cambionan fiscal reciente, e relacion cu Hulanda pa locual ta trata COHO y RAFT, y e supervision financiero di CAFT.
Mester remarca cu a ‘primera vista’, S&P ta satisfecho pa mira con Aruba ta recuperando despues di e pandemia y tur locual a wordo haci pa asina por mantene e credibilidad financiero di nos Pais.
Minister Maduro ta gradici tur stakeholders pa nan input balioso pa e evaluacion di Aruba y ta gradici e team di S&P pa nan trabou dedica y nan bon cooperacion di semper pa Aruba. Fin di maart por spera e resultado di e evaluacion.
