Diahuebs 12 y diabierna 13 di januari Aruba, Corsou, Sint Maarten y Hulanda a tene reunionnan pa discuti diferente tema, entre otro e deficit democratico y COHO. Diabierna durante un conferencia di prensa virtual a keda anuncia cu e cuater paisnan a logra yega na un acuerdo di principio riba e ‘Onderlinge Regeling’, un areglo mutuo, cu ta bin na luga di e ley di Reino di COHO cu a wordo proponi anteriormente.

Secretario di Estado, Alexandra van Huffelen, a comenta cu nan tabatin hopi bon discusionnan y cu e ta contento cu nan a yega na un acuerdo, despues di dia intenso di discusionnan cu a forma un base nobo pa e cooperacion no solamente den aña 2023 y pero tambe pa e añanan cu ta bin.

Van Huffelen a indica cu despues di tur e añanan duro cu e paisnan a pasa aden, e cooperacion ta hopi importante pa e bista pa futuro cu no ta basa solamente ariba cosnan cu ta bay malo of e dificultadnan cu e paisnan tabatin, pero ariba oportunidadnan y optimismo y e camindanan nobo pa dilanti den e cooperacion den reino.

“Mi ta hopi contento pa wak e crecemento economico bin bek y cu tin oportunidadnan nobo pa trabou, pa desaroyo y pa inversion na beneficio y bienestar di e hendenan cu ta biba na e islanan di Caribe di nos reino”, el remarca.

El a splica cu nan no a djis papia, pero tambe nan a yega na e acuerdo ariba e aspectonan di con nan ta bay sigui pa dilanti, con nan ta bay traha hunto den un cooperacion basa ariba confiansa mutuo den equidad y tambe propiedad di tur e bandanan. “Un cooperacion cu mester no solamente hiba na e decision corecto, pero tambe hiba na e sentimento y confiansa cu nos tin mester pa nos por sigui pa dilanti.”

Despues di e discusionnan, van Huffelen a sigui splica cu nan a diseña un caminda pa dilanti hopi cla y esaki tabata algo importante pasobra durante e ultimo aña, desde cu el a asumi su trabou, semper a discuti e tema di COHO y segun el a indica, ta hopi importante cu aworaki nan a yega na un conclusion indicando cu nan kier traha ariba e base di cooperacion mutuo y e base ey ta basa fuertemente ariba e idea cu tin trabou cu mester wordo haci di parti di tur e partidonan involucra.

“Nos ta bay fortalece e clima pa entrepreneurship, nos ta sigui traha pa desaroya educacion y e vinculo entre educacion y e mercado laboral. Nos ta bay traha pa sigura tambe cu den futuro cu e sistema di cuido medico ta pagabel. Nos ta bay traha ariba reformanan fiscal nobo y nos ta bay sigura cu tur esaki por wordo realisa pa gobiernonan cu ta fuerte y cu ta wordo apoya pa Hulanda pa haci locual mester haci”, van Huffelen a enfatisa.

Pa loke ta pregunta di prensa tocante geschillen regeling y e tempo stipula cu por spera cu e regulacion aki ta cuminsa finalmente, Prome Minister di Aruba, Evelyn Wever-Croes, a indica cu loke nan a acorda ta cu nan lo warda ariba e deliberacionnan di parlamento di cada isla.

E cuater parlamentonan lo reuni pronto na IPKO y despues nan lo dialoga ariba esaki y nan lo warda ariba e resultadonan di e discusionnan ey pa despues gobierno por tum’e over.

For di un medio di comunicacion local, Wever-Croes a ricibi e pregunta si tin falta di comunicacion den e fraccion di MEP mirando cu Parlamentario Tromp-Lee ta papia di exoneracion, mientras cu Prome Minister a ratifica su compromiso pa paga e debe di Aruba na Hulanda.

Prome Minister a indica den su contesta cu no tin ningun falta di comunicacion y cu e ta kere cu ora un miembro di Parlamento uza su bos, esey ta algo cu mester wordo respeta. “Gobierno tin un posicion y Parlamento por tin otro posicion y nos ta respeta e principionan democratico ariba nos isla”, el a subraya.

El a splica, pa loke ta trata e posicion di Aruba tocante e pago di debe na Hulanda, cu si tin cualkier cancelacion, dispensacion di e debe, mas cu claro nan lo kier ta eligibel pa esey. Pero na unda Aruba ta para aworaki ta cu e ta un prestamo y mester yega na un acuerdo di con e debe aki lo wordo paga bek.

Si mester paga esaki completo bek y pa ki tempo mester page. Esey ta e aspectonan cu Prome Minister a menciona ta importante pa nan aworaki. El a agrega cu nan a cuminsa caba cu e discusionnan aki na Hulanda ora su persona y Minister di Financia tabata na Hulanda na final di aña pasa y nan a yega na un acuerdo cu na februari e deliberacionnan lo cuminsa ariba e punto aki.

Secretario di Estado van Huffelen a ricibi e pregunta con e ta sinti tocante e acuerdo aki cu ta reemplasa COHO y si e ta wak e como un perdida pa Hulanda.

E Secretario di Estado a enfatisa cu locual e ta wak ta cu aworaki tin un acuerdo cu ta wordo apoya pa tur e paisnan y full e idea tras di e reformanan y e idea di cooperacion ta cu nan ta bay hacie hunto pasobra e base pa crecemento, no solamente economico, pero tambe den terminonan di educacion, cuido medico etc, ta e reformanan aki.

“Nos a acorda cu e reformanan aki ta na e centro y curason di locual nos lo traha riba dje hunto, den terminonan di compartimento di capacidad, hende, pero tambe apoyo financiero. Mi ta kere di berdad cu yegando na e acuerdo cu esey ta locual nos ta bay haci, na beneficio di e hendenan cu ta biba na e islanan di Caribe, ta un stap hopi grandi pa dilanti”, el a indica.

El a agrega cu e problema cu e ley di reino cu nan a propone pa COHO y cu a manda pa tur e parlamentonan ta cu e no a haya e apoyo necesario y p’esey personalmente e ta haya hopi importante cu aworaki nan tin un acuerdo cu tin e apoyo y e base di e apoyo for di tur e paisnan: “Mi ta spera cu aworaki cu mas esfuerso y den cooperacion mutuo nos ta bay establece loke nos kier logra.”

E ekiponan di e conseheronan lo finalisa e palabracionnan y ta spera cu na comienso di maart 2023 por firma e acuerdo mutuo.