Durante conferencia di prensa ayera mainta, relaciona cu e bishita real cu Aruba ta bay ricibi, presidente di comision di organisacion di bishita real a anuncia e bishita real cu ta bay tuma luga pa final di luna dianan 30 y 31 di januari.

E bishita real a wordo anuncia caba dia 1 di september 2022, pero na e momento ey no tabata contene mucho informacion ni detaye tocante esaki, solamente cu ta bay bin un bishita real.

E seis isla di Caribe Hulandes, ex-Antias Hulandes, ta bay ricibi bishita di su Mahestad Rey Willem Alexander, su mahestad Reina Maxima y e princesa heredero, Prinses Amalia. Aruba ta ricibi e bishita real dianan 30 y 31 di januari.

E anfitrion di e bishita ta su excelencia Gobernador di Aruba, Alfonso Boekhoudt kende ta bay compaña e bishitantenan real durante e actividadnan y Secretaria di Estado, Alexandra van Huffelen tambe ta bay compaña e famia real durante nan bishita na Aruba.

For di luna di augustus e comision di organisacion di bishita real tabatin na su encargo e preparacion di e programa di actividadnan pa e dos dia cu e famia real ta bay ta na Aruba.

“Laga mi bisa boso, esey no tabata facil. Nos a haya hopi idea, hopi proposicion, hopi peticion pa wordo inclui den e programa y naturalmente nos mester a traha un balans den e programa cu nos ta ofrece pa e bishita real aki,” e presidente di e comision a indica.

For di Hulanda tambe e comision a ricibi algun peticion y instruccion pa e bishita real y cu tur esaki nan a forma un programa cu, segun e presidente di e comision, nan ta kere ta uno balansa.

Ta importante pa menciona cu esaki ta prome biaha cu e Prinses Amalia ta bay ta bishitando e islanan, y e Prinses a caba di cumpli 18 aña di edad. E presidente di e comision ta splica cu pa e bishitante real aki nan a tene cuenta cu esaki y ta bay tin enfoke ariba aspectonan hubenil, aspectonan di su interes como studiante y nan a hinca esey den e programa tambe.

“E palabra cu a wordo menciona tabata beleven, experimenta, biba, pasa den pa nan experiencia cierto aspectonan. Y esey nos a purba di haci durante full e programa pa e bishita aki,” el a indica.

E programa di e famia real durante su bishita na Aruba ta uno cu yen di diferente actividad y diferente oportunidad tambe pa pueblo di Aruba por yega cerca di e famia real. Den nos edicion di mañan mas detaye di e bishita real.