Mirando cu temporada di carnaval a cuminsa y e prome parada a tuma luga fin di siman ultimo, tin un tema cu a causa controversia ya cu e aña aki segun loke Cruz Cora a señala den un comunicado, SMAC no a acerca na nan pa cubri e carnaval den e area siguridad, salud y prome auxilio.

Den un comunicado Cruz Cora a señala cu mirando cu Cruz Cora Aruba ya tin mas cu 50 aña caba brindando su servicio cu boluntarionan certifica y material amplio na tur presente den e diferente eventonan, Directiva a acerca Presidente di SMAC pa sinta na mesa y esaki ta tuma luga na principio di otro siman. Cruz Cora Aruba ta preocupa pa siguridad y salud di tur participante y publico na banda. Semper a yega na un bon acuerdo cu antes SAC y tambe desde cu SMAC a tuma over.

Sinembargo, Bon Dia Aruba a tuma contacto cu SMAC y Cruz Cora na unda nan a informa cu esaki no a tuma luga te ainda.

Por a compronde cu e organisacion encarga cu esaki ta Event Medical Services (EMS) di e cual Bon Dia Aruba no por haya mucho informacion di nan, solamente cu nan ta duna servicionan similar na Cruz Cora, di su parti, SMAC a señala cu nan a dicidi di scoge EMS pa traha cu SMAC den Fakkel pa asina por baha gasto mirando cu no ta facil pa ni un instancia ni pa nan pa por haya mucho sponsor.

Presidente di SMAC Darren van Ommeren no a informa na Bon Dia Aruba si e trabou di EMS den Fakkel tabata optimal pa asina nan por sigui traha cu nan den e siguiente parada y si nan tin suficiente ekiponan of ambulance na momento cu un incidente lo por tuma luga.

Tin varios pregunta cu comunidad tin tocante EMS como por ehemplo, si nan ta registra na Camara di Comercio di Aruba? con e trabou di EMS tabata den e prome parada di Fakkel di siman pasa? si algun persona a haya algun incidente y nan por a ayud’e? con e personanan por busca nan den un parada? con nan ta distingui di e publico asistente ora un persona mester acudi na nan buscando ayudo? nan si ta conta cu ekiponan medico y di siguridad suficiente pa tanto e participantenan y publico en general -tambe turistanan- por sinti salvaguardia den e diferente punto di e paradanan?

Igualmente Rainbow Warriors Core Foundation tambe a trece su preocupacion cu por wordo considera como valido mirando cu comunidad tabata custuma caba di wak Cruz Cora den tur eventonan asina grandi pa loke ta trata prome auxilio.

“Salvaguardia orden publico, siguridad y bienestar fisico pa eventonan y multitudnan grandi ta un responsabilidad segun ley di Minister di Asuntonan General y Minister di Husticia. Cuerpo di Polis y un entidad encarga cu prome auxilio y EMR ta responsabel pa ehecuta e tareanan aki.”

Na mesun momento nan a afirma cu SMAC a scoge pa desvia di esaki y a otorga e contract na Urgent Care Aruba cu ta bay usa personal paga lo cual a wordo desmenti pa Van Ommeren den un entrevista na un otro medio di comunicacion unda el a bisa cu no ta Urgent Care e compania cu a keda contrata pa esaki.

Mientras tanto, Bon Dia Aruba ta sigui busca informacion pa asina ey comunidad por keda informa y purba di aclaria diferente rumornan na unda preocupacion ta presente pa salvaguardia e integridad tanto di e publico asistente como tambe di e participantenan y di esnan cu ta bin na Aruba pa wak un di su actividadnan mas grandi y conoci den region, cu den temporada di Carnaval 69 a keda den man di un organisacion di e cual no tin mucho informacion y ta esey loke Bon Dia Aruba kier duna di conoce mirando cu comunidad a keda den shock ora Cruz Cora a informa cu nan no ta bay ta presente e aña aki dunando nan servicio.