Riba rednan social for di algun tempo ciudadanonan local a bin expresando nan malcontento pa por haci uso di e beachnan na Aruba, na unda cierto comerciantenan ta scoge e beach pa lanta nan negoshi of hasta e construccion di hotel. Ta yega di puntra si den futuro lo ta posibel pa local por usa e mesun beach cu ta publico?
Ta comprendibel cu tin hende cu a wordo afecta pa pandemia, cu a keda sin trabao, y nan a haya idea di crea nan mesun negoshi pa turista, cu ta esnan cu ta e pilar economico di Aruba. Pero tambe ta importante pa puntra, cua ta e instancia encarga di duna permiso y controla e cosnan aki? Manera e potret ta ilustra.
Esaki ta ubica na area di Baby Beach y tambe na Arashi, manera usuario di red social Facebook a señala. E usuario a indica tambe cu e personal encarga cu esaki a bis’e pa no pone su stoel dilanti esakinan, pasobra “ta stroba e bista di e turista”, como si fuera ta e turista so e unico cu tin derecho di usa e beach cu ta di uso publico.
Bon Dia Aruba ta bay tuma contacto cu instancianan encarga tanto di turismo como di infrastructura pa asina aclaria e situacion fastioso aki cu ta causa un mal contento den e comunidad local.
