(AP) — E mucha di seis aña cu a tira y herida su maestra a saca e arma for di su muchila y a los tiro riba e maestra mientras e tabata dunando les, e hefe di polis a declara.
Dialuna e hefe di polis di Newport News Steve Drew a ofrece e prome descripcion di e tiramento cu a tuma luga. Prome e a bisa cu e tiramento no tabata accidental y a nenga di elabora riba esaki.
E a bisa cu e studiante a saca e arma, punta riba e maestra y a los tiro. E a constata tambe cu no tabata tin pelea prome cu e tiro. Ningun studiante a keda herida.
Drew a declara cu e mama di e mucha a cumpra e arma legalmente na York County. E arma tabata den cas, e mucha a hink’e den su muchila y a trece scol.
Drew tambe a bisa cu un empleado na e scol a deteni e mucha despues di e tiro y cu e mucha a tira mokete pa e empleado. A hiba e mucha homber den auto di polis.
Un vigila tabata planea pa 6:30 di atardi pa honra e maestra Abby Zwerner.
Cabesante Briana Foster Newton a declara den un update riba e website di e scol cu scol lo keda cera pa un siman.
Polis a nenga di describi kico por a causa e tiramento o cualkier detaye tocante kico a sosode den e lokaal. Nan a nenga tambe di bisa con e mucha a haya acceso di e arma y ken ta doño di e arma.
Ley di Virginia ta prohibi pa muchanan di seis aña haya persecucion como adulto. Tambe un mucha di seis aña ta demasiado hoben pa por wordo deteni den departamento di husticia hubenil si e wordo declara culpabel. Autoridadnan no a specifica unda e mucha ta deteni.
