Despues di dos aña pueblo di Aruba a disfruta diasabra di un Fakkel Optocht (Parada di Flambeu) yen di ambiente y musica di carnaval. Seis grupo y mas di cinco di mil persona tabata riba caminata disfrutando e inicio di Carnaval 69.

Aña 2020 tabata e ultimo aña cu Aruba a disfruta di temporada di carnaval prome cu e pandemia di COVID-19 a yega Aruba y a cambia bida completamente. Hopi tabata en espera di e gran anochi aki pa nan jump, baila y gosa un biaha un temporada cu ta un parti grandi di Aruba su cultura.

Minister di Cultura, Xiomara Maduro hunto cu SMAC a cende e mecha y pa 7:58 Fakkel Optocht a ranca sali pa duna inicio oficialmente na temporada di Carnaval 69. “Aruba ta haci apertura di Aruba su Carnaval 69 cu Parada di Flambeu. Exito na SMAC, tur grupo y participante. Disfruta sanamente,” tabata Minister Maduro su mensahe ariba su cuenta oficial di Facebook.

Durante parada, reportero di Bon Dia Aruba a combersa cu algun participante y persona na banda pa asina haya sa kico e sentimentonan ta y con nan a pasa paden y pafo di parada.

“Porfin nos por celebra. Despues di dos aña carnaval tey back y nos ta cla pa goza, pero claro sin haci di mas. Tur hende bay poco poco,” John Tromp a bisa, un participante di e parada di flambeu cu tabata disfrutando di e dushi ambiente.

E entusiasmo tabata grandi pa e prome parada di e temporada nobo di carnaval y esaki tabata riparabel cerca algun participante cu a bay ‘all out’ y a decora nan t-shirtnan completamente na steenchi, payet y luz y hasta a traha headpiece cu pluma pa compaña nan vestuario.

“Ami stima carnaval. Mi ta hopi contento cu nos por disfruta di carnaval atrobe. Mi tin hopi aña ta participa, mi ta kere mas cu 10 aña. Mi a bay all out awe nochi. Mi make up, mi paña, mi headpiece. Mi ta cla pa goza y mi ta cla pa e otro paradanan tambe,” carnavalista Joanne Ras a bisa.

Hendenan na banda tambe tabata disfruta di e ambiente y e musica di carnaval. Jose Hernandez y su famia tabata banda disfrutando di e parada manera ta custumber. “Ami cu mi famia gusta carnaval. Nos gusta bay e paradanan y pasa un bon rato. Nos ta para na banda wak tur e bunita pañanan. Awe fakkel tabata hopi bon. Hopi dushi ambiente. Nos ta cla pa sigui enjoy e resto di e paradanan,” el a bisa.

Cornelia Werleman tambe a goza di a ambiente di Fakkel for di na banda di caminda e aña. “Normal mi sa bay den e parada, pero e aña aki mi a cambia di idea y mi a dicidi di para na banda pa disfruta. E paradanan grandi si mi ta bay aden, pero mi a salta fakkel e biaha aki. E ambiente tabata hopi bon tambe,” Werleman a indica.

Sea ta den dje of na banda, no tin duda cu e multitud di hende cu a sali pa duna inicio na e temporada di carnaval a disfruta di Fakkel Optocht y ta cla pa sigui celebra Carnaval 69.