Na nos mesa di redaccion a drenta informacion di parti di un turista cu recientemente tabata di bishita na Aruba cu su famia. E turista aki a informa Bon Dia Aruba cu su vakantie a haya un nubia scur pa motibo di un accident cu su yiu a sufri mientras e tabata maneha un ATV riba careteranan di Aruba.

No ta prome biaha cu na Aruba turista, como tambe local ta envolvi den accident cu vehiculonan ATV of UTV. Pa hopi tempo caba tin bataya di parti di algun organisacion y ciudadano cu ta contra e uso di e vehiculonan aki riba caretera, pa motibo cu nan ta peligroso y ademas nan ta causa daño na naturalesa.

Segun e turista ta splica, nan a yega Aruba dia 24 di december y ariba dia 27 di december e famia completo a huur ATV y UTV pa 16 persona. Nan a core henter dia cu e vehiculonan ariba e camindanan cu e compania, George’s Rental, a indica nan pa core.

Na final di dia nan tabata regresando for di Baby Beach pa entrega e vehiculonan back na e compania y segun e turista ta enfatisa, nan a sali for di Baby Beach na e ora stipula pa no rush y pa no yega laat.

El a sigui conta cu mientras e ta coriendo riba caminda, e ATV di su yiu a haci un zonido duro y a cuminsa huma. Su yiu inmediatamente a para e vehiculo, el a baha gritando y a kita su paña.

Ta resulta cu e tapa di azeta a bula y e azeta cayente a kima su pia. El a wordo traslada pa hospital asistencia cu su heridanan ariba su gluteo, bil y enkel. E mester a ricibi diferente tratamento pa su herida.

E turista ta indica cu e compania en cuestion no a tuma contacto cu nan y cu e compania a bisa nan cu ta pa nan mesun culpa e accident a sucede, pasobra nan tabata coriendo mucho duro, cual e turista ta enfatisa no ta e caso.

Bon dia Aruba a tuma contacto cu e compania, George’s Rental pa asina aclaria e situacion lamentabel aki.

E representante di e compania a splica Bon Dia Aruba cu situacion, for di nan punto di bista, ta hopi simpel: e turista mes a ocasiona e accident pa motibo cu no a scucha e advertencia y tabata core mucho duro.

“Semper mainta nos ta papia cu e turista pa core suave, vooral ora nan ta biniendo back di Baby Beach bin abao, pa no core full trot pasobra e motor por bira cayente y e presion di full trot ta bula un tapadera di azeta y esey ta kima. Nos ta papia cu nan mainta y nos tin sticker tambe ariba e vehiculo pa core trankil pa no tin niun problema,” George’s Rental a indica.

El a sigui splica cu tur cliente cu huur vehiculo cerca nan ta firma un contract cu ta bisa cu ora nan huur un vehiculo di nan, e clientenan ta responsabel pa nan actonan. E daño haci na e vehiculo, si bay draai rond, bolter etc. e cliente tin cu paga pa esey y si nan haya cualkier herida, den e contract mes ta poni cu e gastonan cu ta bin pa motibo di accident door di nan mesun fout, nan mes tin cu paga esey.

E compania a remarca cu den nan contract tin poni cu seguro ta cubri solamente ora cu ocasiona daño na otro, kiermen WA verzekering, cu ta den caso cu dal vehiculo di otro persona. Pero e tipo di vehiculonan ATV y UTV no ta haya seguro all risk y pues no ta cubri tipo di accidentnan asina.

“Nan ta firma e contract, nan ta bay di acuerdo cu e reglanan. Mi mes tabata den van ta combersa y splica nan tur cos, cu nan no por drenta parke, cu nan tin cu core trankilo pasobra nan kier kita e vehiculonan aki for di Aruba, tur esey. Ora mi ta combersa cu e mama cu ta manda e informacion ey, e yiunan mes ta patras ta papia y no ta tende y e ora e cosnan ey ta pasa. Pasobra nan no ta scucha,” el a agrega.

Anteriormente Bon Dia Aruba a ricibi informacion di otro turista cu tambe a pasa un mal experiencia cu un di e vehiculonan UTV y aworaki ta pagando un prijs hopi halto pa motibo di esaki.

E turista aki, un studiante di Boston, Massachusetts, ta un bishitante regular di Aruba pa hopi aña caba. Den luna di juni el a bishita Aruba y a huur un vehiculo UTV for di e compania Aruba Adventure Tours. Lastimamente el a haya un accident cu e vehiculo y a causa daño na e vehiculo.

El a conta cu despues cu e doño di e compania a inspecciona e vehiculo y a declar’e total loss. Segun e turista, e doño a sigur’e cu e seguro di huur di credit card di e turista lo curbi e gastonan y cu e no lo mester paga nada. E compania e cobra e hoben 20mil dollar pa e vehiculo.

Algun dia despues, na caminda pa aiport, e hoben ta sigura, el a mira e mesun vehiculo cla pa huur. Pues e vehiculo tabata funciona bon y no tabata total loss manera e doño a bisa.

Lastimamente e seguro no a cubri e gastonan, manera e doño di e compania a bisa y e hoben mester cubri e 20 mil dollar cu e compania a cobr’e di su mesun saco.

Continuamente tin turistanan ta huur e tipo di vehiculonan aki cu e speransa cu nan lo disfruta di nan vakantie, pero lastimamente e resultado ta otro y nan ta bay laga Aruba cu un memoria no agradabel y e posibilidad di no bishita e isla mas.