Fundacion Diabetes Aruba cu expectativa pa otro aña exitoso

Den aña 2022 Fundacion Diabetes Aruba (FDA) tabata activo den diferente evento y actividad pa yuda trece conscientisacion den comunidad ariba e topico di diabetes, pero tambe enfermedadnan cardiovascular. Charlenne Leslie, Project Coordinator di FDA, a elabora riba e diferente proyecto di FDA den aña 2022 y ki proyecto tin riba mesa pa aña 2023.

Leslie a splica cu den aña 2022 nan a sigui cu e cursonan di Prisma, cu ta pa personanan cu diabetes tipo 2, pero nan a cuminsa un poco mas laat cu e cursonan, nan cuminsa na luna di september y a ofrece curso te cu e prome siman di december.

“Nos tabatin cinco curso so e aña aki, den esey pa e aña aki nos tabatin menos tempo y menos curso, dus e cantidad di persona total cu nos por a yuda cu e curso e aña aki tabata poco menos compara cu aña pasa. Basa riba e cinco cursonan cu nos a ofrece nos tabatin alrededor di 40 persona cu a participa na e esaki,” Leslie a indica.

Pa loke ta cifranan di personanan cu diabetes den 2022, el a splica cu nan no tin cifranan up to date pa por haci comparacion y pa aña 2022 nan no a haya cifra ainda. Apart di esey cifranan cu nan tin no ta completo tampoco, den sentido cu e no ta duna e cantidad precies pasobra e cifranan cu nan ta haya entre for di AZV ta solamente di esnan cu ta usando medicamento caba.

El a subraya cu tin hopi persona cu por ta diabetico of no sa cu nan ta diabetico, cu no ta usando medicamento cu ta cay afo di e grupo aki.

El a agrega cu e praktijkondersteuners tambe tin cifranan di e cantidad di persona cu diabetes cu nan ta atende, pero no tur dokter di cas tin un praktijkondersteuner. “Eynan e ta keda fastioso pa tin un bista completo di e cantidad di persona cu tin diabetes na Aruba,” el a bisa.

Pero locual si nan a ripara, Leslie a remarca, ta cu tin un tendencia den ultimo añanan, desde 2018 mas o menos, cu ta muestra cu e cantidad tabata keda subi cu un 200 persona pa aña, pero en realidad nan no por saca ningun conclusion concreto for di e cifranan aki. “Nos ta ripara si cu tin un crecemento, pero mi no por conclui ariba preto cu blanco sin tin e bista total,” el a enfatisa.

Leslie a conta cu Fundacion Diabetes Aruba a participa den un variacion di ‘health expos’ organisa pa entre otro boticanan, Rode Kruis y DVG. FDA tabata presente na tur esakinan cu diferente charla. FDA a traha hunto cu un grupo di Universidad di Aruba tambe unda nan a organisa un trivia game night na universidad mes pa asina trece conscientisacion riba diabetes, pero na mesun momento pa recauda fondo tambe pa yuda e fundacion.

FDA a organisa tambe un actividad bao di e capa di Aruba Doet, cu a tuma luga na Centro di Bario Brazil. Leslie a sigui splica cu durante e evento aki e participantenan a haya prome un charla tocante tur e factornan di riesgo cu tin di haber CVA, stroke, malesanan cardiovascular y tambe diabetes y a base di esey nan a sigui riba e aspecto di alimentacion, con por preveni e malesanan aki y influencia factornan di riesgo cu alimentacion.

E participantenan a haya e oportunidad tambe di prepara algun receta simpel pa asina nan tin un idea kico nan or prepara na cas mes cu lo por yuda nan pa preveni e factornan di riesgo.

Banda cu nan a cuminsa cu e evento aki pa Aruba Doet, FDA a organisa e evento tres biaha mas tambe na Club Kibrahacha cu e mesun concepto.

Leslie a conta tambe cu rond di World Diabetes Day nan tabatin un colaboracion cu e praktijkondersteuners unda cu nan a introduci e programa Kids Program di International Diabetes Federation (IDF) cu ta un programa cu ta encera un charla hopi interactivo cu wega tambe pa muchanan di vijfde, zesde klas basis.

E Kids Program tin como meta trece conscientisacion di diabetes, kico diabetes ta y no solamente diabetes tipo 2, pero tambe diabetes tipo 1 pa si acaso tin un mucha na scol cu tin diabetes tipo 1, nan sa kico esaki ta nifica y con e bida di e mucha lo por ta diferente, pero toch cu e por tin un bida completo y saludabel.

“Hunto cu e praktijkondersteuners nos a bishita tres diferente scol y shete traimerdia pa introduci esaki y esaki ta un proyecto cu nos ta bay sigui cune e aña aki,” Leslie a menciona.

Banda di e cursonan di Prisma, FDA tabatin e Diabetes Walk & Run cual tabata un evento completamente exitoso. Tabatin casi 1200 participante y e participacion di cada persona a resulta den un bunita donacion di 15 mil florin na Fundacion Diabetes Aruba.

Pa loke ta proyectonan pa aña nobo, Leslie a sigura cu nan ta bay sigui cu Prisma Diabetes manera ta conoci, pero nan kier introduci tambe Prisma Prevencion, cual ta mesun concepto pero ta enfoca riba prevencion di diabetes y tambe malesanan cardiovascular.

“Nos kier ofrece esaki principalmente na e personanan cu tin factornan di riesgo mas halto pa haya diabetes pa asina nos por purba preveni esaki tambe y zorg pa e cifranan no sigui crece. Pero tur esaki nos tin cu traha riba dje prome pa asina nos por finalisa tur cos prome cu por ofrece esaki,” el a splica.

El a agrega cu nan kier sigui tambe cu e Kids Program y e meta ta pa introduci esaki na mas scol durante full e aña, no solamente na november durante Dia Mundial di Diabetes. Nan lo continua tambe cu e colaboracion hunto cu Fundacion CVA y Heart Foundation.