Dia 1 di januari un hecho a tuma luga na Companashi, unda diferente reportero di medionan local a asisti na e luga aki pa cubri un noticia di un homber cu a drenta den un cas ekiboca y a keda envolvi den un supuesto abuso sexual di mucha. Oranan despues a bira conoci cu e incidente tabata trata di un total confusion.

Loke a wordo informa riba medionan di comunicacion ta cu e homber a drenta den cas y a wordo haya riba un mucha muhe menor di edad “haciendo actonan inmoral” pa loke a bati alarma pa autoridadnan hunto cu JZP y e persona aki a keda deteni.

Despues, a bin resulta cu e noticia aki no tabata berdad y e situacion tabata ful un otro historia manera e mesun persona a declara riba su rednan social ora el a sali liber par di ora despues.

“TABASTA” un grupo basta conoci den comunidad cu ta contra abuso di mucha a splica den un comunicado cu e noticia aki no tabata corecto y completo pa loke nan a dicidi di publica loke a sucede:

“Dia 1 januari 2023 despues di tiro mainta trempan a pasa un incidente unda cu un homber a drenta un cas ekiboca. E homber a caba di sali di un fiesta cu su amigonan unda cu nan a habri aña den bon ambiente y tabata bao influencia di alcohol. E la yega na e cas di su amigo y a keda den auto drumi despues di basta rato e la dicidi di lanta bay paden pa e bay sosega su curpa pero ora e la baha habri porta di cura cana bay habri slidingdoor di e cas e tabata na e cas di e bisiña di su amigo. Sin a pone atencion e la drenta e cas hopi cansa y a bay drumi den un camber caminda tabatin un dama y un menor di edad. Ora e dama y menor di edad a spierta nan a haya e sorpresa di un homber desconoci para memey den nan camber bao influencia di alcohol. Eynan nan a cuminsa grita y e mama a bin y a topa cu e scenario, di biaha e la purba saca e homber di e camber y bati alarma pa polis por bin. E homber no a reacciona y tabata hopi cansa sin camisa sin su bachi cual e la laga den su auto para dilanti e cas ziper kibra y tabata bao influencia cual e la dies keda para sin haci nada. Polis a bin despues di casi 1 ora y JZP su asistencia a wordo pidi.”

Igualmente nan ta sigura cu “noticieronan a trece e storia dilanti como si fuera cu ta un acto di abuso sexual di mucha a tuma luga, a skirbi un storia unda cu famia a haya un homber desconoci sunu riba un damita menor di edad den camber pero esey no ta e berdad”. Nan ta kere door cu homber tabata bao influencia di alcohol y nan a wak JZP na e sitio y nan lo a pensa cu ta un caso di abuso sexual di mucha.

“Nos di TABASTA a wordo notifica di e sucedido y nos a repost e storia di e noticiero keriendo cu tabata un caso di abuso sexual di mucha pero nos a check informacion y un par di minuut despues nos a elimina e post”, nan ta sigura.

For di varios persona nan a bin haya diferente storia cual a duna nan e impresion cu algo no ta cuadra.

Nan a bay verifica cu instancianan y conocidonan unda ta berdad cu no tabata tin un victima of victimanan di abuso sexual di mucha y tampoco tabatin un abusador sexual di mucha den e caso aki.

Segun loke nan a afirma den e comunicado nan a yama cierto pagina di noticia pa por a splica nan kico di berdad a pasa pero niun no a contesta telefon.

E grupo TABASTA a pidi disculpa na e persona aki ya cu nan a publica cierto informacion na comienso, igualmente cu e noticieronan cu despues a resulta un otro historia.

Tambe nan a tuma contacto cu e mama di e mucha y su yiunan cual a topa cu e homber den cas pa tende nan banda. Despues di a papia cu ambos partido nan a tuma contacto cu Slachtofferhulp pa asina por brinda ayudo na e mama y su yiunan cual a pasa den un momento traumatico.

E persona envolvi den esaki e cual a wordo acusa di manera no corecto tambe a duna e banda di medaya y a bisa cu e mes “tin 2 criatura cual e ta stima masha hopi mes y e la sigura nos cu hamas e lo haci daño na nan y cu e ta compronde con e famia ta sinti y ta lamenta hopi loke e a pasa.”

Door di e actonan buracheria. E famia ta lamenta esaki y lo kier pa ciudadanonan di Aruba ta mas consciente ora di consumi alcohol, pa no keda envolvi den situacionnan fastioso of cu por causa daño na otro hende.