Mediante un comunicado riba rednan social e organisacion gubernamental Santa Rosa e trece dilanti informacion cu nan a haya tocante hendenan cu ta tirando sushi y awa septico na algun damnan por ehemplo esun di Hooiberg cu por crea un peliger pa comunidad.
Mediante e comunicado nan a informa cu door di nan seccion di bedaming nan a wordo notifica cu hende nan ta tirando sushi na e dam di Hooiberg. Alabes ta mustra cu probablemente lo tin truck nan septico tirando awa den e dam.
DVG a wordo notifica pa nan por bay test e awa pa Ecoli. Pa e motibonan menciona, Santa Rosa a laga cera e entrada te ora nos ricibi e resultado di e test di awa.
Lamentablemente esaki ta awa cu ta wordo usa pa muha mata nan di berdura y fruta y pa bestia bebe.
Pa e motibo aki, un biaha mas Santa Rosa ta haci un apelacion na tur persona pa no tira sushi of awa septico den e damnan pasobra esaki por crea un peliger pa tur hende.
Ta comprendibel cu dump di Parkietenbos a cera y cu ciudadanonan por ta ainda no ta conoce e pasonan pa nan deshaci di nan desperdicionan, pero esaki no ta un di e manera corecto ya cu e awa di dam aki y di otronan manera a wordo menciona caba ta wordo usa pa muha mata di fruta y berdura cu tur hende y bestia ta consumi.
