Recientemente den un medio di comunicacion di Corsou, Curaçao Chronicle, a sali informacion cu Prome Ministernan di Aruba, Sint Maarten y Corsou lo reuni cu Secretario di Estado, Alexadnra van Hufflen den luna di janauri na Sint Maarten pa dialoga ariba e deficit democratico den reino.
Bon Dia Aruba a tuma contacto cu Prome Minister di Aruba, Evelyn Wever-Croes, ken a confirma cu en berdad Aruba ta bay t’ey presente den e reunion entre e Prome Ministernan di e Aruba, Corsou, Sint Maarten y Secretario di Estado Van Huffelen dia 12 y 13 di januari na Sint Maarten.
Premier Wever-Croes a splica cu riba agenda pa e reunionnan aki tin e tema di deficit democratico, cu ta un punto cu ya caba nan ta papiando hopi di dje, mirando cu den reino tin un deficit democratico den tumamento di decision.
“Hopi biaha Hulanda ta impone, Hulanda ta dicidi, Hulanda ta pone condicion y despues nan ta bisa cu nos a bay di acuerdo. Durante pandemia nos a sinti esaki mas cu nunca y nos a compromete nos mes pa asina cu tempo duna, despues di pandemia, nos pone esaki riba agenda y esey ta aworaki riba agenda,” Prome Minister Wever-Croes a indica.
Di parti di Aruba, Prome Minister a indica, cu nan a cuminsa prome cu esaki caba cu consultanan cu diferente instancia y stakeholder den comunidad, y nan a cuminsa haya nan aporte tambe kico nan ta mira como e deficit democratico y con e deficit aki lo por wordo elimina of por wordo minimalisa.
El a remarca cu a base di tur e aporte cu nan ta ricibiendo, y cu nos lo ricibi ainda prome cu dia 12 di januari cu nan cuminsa e reunion, nan lo fiha e posicion di pais Aruba pasobra no ta solamente kico gobierno ta pensa, pero kico e stakeholdernan tambe ta pensa.
“Nos a pidi e opinion y input di Parlamento di Aruba, nos a pidi di nos colegionan halto di Estado, di Universidad di Aruba, di Fundacion Bon Gobernacion di Aruba y a base di esey nos lo fiha nos posicion,” el indica.
El a e enfatisa cu e hecho ta cu tin un deficit democratico grandi den reino, pero pa Prome Minister ta hopi importante pa durante e reunionnan di 12 y 13 di januari na Sint Maarten, cada Prome Minister fiha kico cada pais su expectativa ta pa cu e tema aki.
Wever-Croes a menicona cu el a yega di tende algun pais bisa cu e deficit democratico ta wordo elimina completamente ora cu un pais, por ehempel na Corsou, tin mesun voz cu Hulanda y Hulanda a bisa cu esey nunca lo pasa pasobra Hulanda ta representa mas habitante cu Corsou. “Kiermen ta importante pa nos cada un tin nos expectativanan hopi bon defini pasobra si no e deliberacionnan ta bira un fracaso,” el a subraya.
El a agrega cu pa Aruba tambe ta hopi importante, y el a indica cu nan a pone esaki riba papel caba, cu tal bes nan no por elimina e deficit democratico riba termino corto, pero ta importante pa cuminsa en todo caso cu un ley di resolucion di disputa cu ta decente, drechi, den cual como Aruba nan ta sinti cu si en caso tin un disputa cu Hulanda, tin un areglo cu ta duna nan e derecho y ta salvaguardia e derecho di Aruba pa por bringa esaki tambe.
Tambe ta spera cu e propuesta di ley di consenso di reino pa establecimento di e Organo Caribense pa Reforma y Desaroyo (COHO) ta bay ta riba agenda. E version entrega pa Hulanda a ricibi resistencia fuerte, cual ta e motibo pakico Aruba, Sint Maarten y Corsou a manda alternativanan.
Prome Minister Wever-Croes a indica pa loke ta e tema di COHO ta asina cu en berdad durante e ultimo reunion di bestuurlijk overlegging den juni di aña pasa aki na Aruba caminda Secretario di Estado tabata na Aruba y e Prome Ministernan di Corsou y Sint Maarten tambe, a keda palabra cu e paisnan, Aruba, Corsou y Sint Maarten lo prepara un alternativa pa COHO.
El a informa cu Aruba a traha un alternativa den forma di un onderlinge regeling y aworaki Hulanda durante e reunion di 12 y 13 di januari lo duna su comentario riba e onderlinge regeling cu Aruba, Sint Maarten y Corsou a traha y cual si nan tin un consenso riba dje.
