Pa algun tempo caba miembronan di Parlamento di Aruba, ciudadanonan, comerciante y diferente gremionan a expresa nan preocupacion pa cu e estado cu nos centro di ciudad ta permanece aden. Nan a pone accento ariba e responsabilidad cu gobierno di Aruba tin y cu gobierno di Aruba mester activa mas rapido posibel y trece bida back den nos centro di ciudad. Un reto, cu Minister Geoffrey Wever, a hereda y a tuma e encargo aki cu dos man.
Despues di hopi sondeo y planificacion, memey di stakeholders dia 13 di december ultimo, Minister Geoffrey Wever a presenta e prome fase di Revitalisacion di Oranjestad: Embeyecimento di e area di Wilhelminastraat cual lo cuminsa den januari 2023. A habri caya Betico F. Croes, un biaha mas pa trafico, a redirigi e tram y asina poco poco ta implementando e strategia cu lo mester yega na revitalisa e area.
Minister Geoffrey Wever a divulga tambe cu hunto cu sector priva, den lunanan nos dilanti lo anuncia algun Proyecto, manera proyecto di apartamento, proyecto di residencia pa studiante, y move departamentonan di gobierno den centro di ciudad.
Tur esaki seguramente no por ser logra sin cooperacion estrecho entre sector priva, nos institutonan financiero, y gobierno di Aruba. Gobierno cu e poco fondonan disponibel a dal e prome stap y ta spera cu e compromiso financiero aki por crea confiansa den sector priva pa hunto crea un ciudad vibrante.
Ciudadanonan mester por considera pa bin biba den centro, y pa haci negoshi hunto cu entretenimento. Alabes, turistanan mester por haya e caminda bishita back mas frecuente. Pa añanan largo no ta logrando pa atrae turista den centro. Gobierno su so no lo por crea e condicionnan necesario pa crea e realidad nobo aki.
Minister Geoffrey Wever ya ta den combersacion serio cu algun instituto financiero, presentando plan y compartiendo su strategia y ta wak cu poco poco e apetit ta creciendo pa inverti nos centro di ciudad.
Segun analisis haci pa departamento di Asunto Economico, Comercio y Industria, inversion den nos centro di ciudad no lo solamente ta nifica revitalisacion di nos centro pero lo tin consecuencia positivo pa nos economia en general. Cada 10 miyon florin di inversion den nos economia, lo conduci na un crecemento economico nominal di 0,1 porciento di nos GDP. P’esey, pa logra e impacto maximo, y un ‘spin-off effect’ nacional, hunto so lo por logr’e.
“Nos atencion special pa e area aki no lo tin beneficio solamente pa e area pero ta un forma pa crea mas actividad economico y inversion na nos Pais”, minister Wever ta expresa. Cooperacion entre sector priva, institutonan financiero, y gobierno ta e formula corecto pa logra un desaroyo sostenibel den nos centro di ciudad.
