Santa’s Cause ta un fundacion cu ta dedica na traha pa trece alegria pa mucha- y hobennan den necesidad durante temporada di Pasco. Den un entrevista cu Stichting Santa’s Cause Aruba (SCA) ta conta Bon Dia Aruba con aña 2022 a bay pa e fundacion y kico ta e expectativanan pa e aña nobo aki.

Stichting SCA a cuminsa na aña 2018 como un proyecto, di hobennan profesional y studiante, cu tabatin un deseo y a sinti un responsabilidad social pa duna muchanan entre 0 pa 18 aña di edad di menos recurso un regalo pa Pasco. “E idea tabata pa yuda mayornan durante temporada di Pasco pa nan tin un stress financiero menos,” SCA a indica.

E prome aña e fundacion kier a duna minimo 100 mucha un regalo pa Pasco y a logra haci alrededor di 200 mucha feliz durante e prome aña. Desde e aña ey, cada aña e cantidad di mucha y hoben a crece te cu aña pasa e fundacion a logra duna mas cu 800 mucha un regalo.

SCA ta splica cu e idea cu e fundacion a bin cune ta pa padrino of madrina (godparents) cumpra regalo pa e mucha- y hobennan. Esaki por ta cualkier persona, scol y/of compania cu ta acerca e fundacion via nan pagina di Facebook of Instagram.

E godparents ta haya edad, sexo y lista di deseo di e mucha(nan) y nan lo hunga rol di Santa Clause y cumpra regalo den e criteria pa nan.

“Nos ta traha cu lista di deseo di cada mucha hunto cu un presupuesto di entre 40-60 florin. Nos ta sigura cu cada mucha y hoben ta haya un regalo di bon calidad y di nan gusto. Algo cu lo dura y cu nan mester kier. Nos ta tuma e criterianan hopi serio,” SCA a remarca.

Pa loke ta e aña aki e fundacion ta hopi contento cu nan logro. E meta inicial tabata pa regala alrededor di 750 mucha y hoben un regalo y nan surpasa e cifra aki. SCA a logra duna mas di 800 regalo di Pasco na mucha- y hobennan den necesidad.

A pesar di a surpasa nan meta, e fundacion ta conta cu nan tabatin algun dificultad. Algun dia prome cu nan deadline yega nan a ripara cu nan tabata falta casi 200 regalo. E fundacion a publica esaki online y den dos dia nan a logra, cu ayudo di pueblo (godparents) y companianan cu a cumpra regalo of manda nos placa, haya e 200 regalonan cu tabata falta. “Nos ta hopi agradecido na cada persona, compania y scol cu a yuda nos logra nos meta.”

Compara cu añanan prome, SCA a splica cu e lista di mucha y hoben cu ta den necesidad pa un regalo di Pasco a crece. Nan a remarca cu a pesar cu nan contento di por yuda mas mucha, e sentimento ta uno di alegria y tristesa na mesun momento.

“E ta un bittersweet feeling cu tur aña nos ta crece. Nos ta contento cu nos por yuda mas mucha

cu ta posibel haya un regalo, pero e ta tristo pa mira e situacion di hopi famia na Aruba. Pero e

realidad ta cu ainda tin hopi mas mucha cu nos por regala un regalo, pero den e aña nan cu ta

bin nos kier yega na yuda tur e mucha nan cu mester,” a fundacion a enfatisa.

Pa loke ta expectativanan pa e aña nobo, SCA a indica cu pa temporada di Pasco 2023 nan lo kier logra regala 1000 mucha y hoben un regalo di Pasco, pero nan kier logra automatisa e sistema prome mirando cu e ta un trabou grandi y nan ta un grupo chikito.

El a agrega cu nan ta pensando si nan o haci un proyecto di ‘Back to School’ cu un grupo chikito hunto cu un fundacion cu a acerca nan caba pa traha hunto pa wak con e ta bay. E idea di e fundacion den futuro ta pa e Godparents adopta e muchanan pa henter un aña. “E gana t’ey di e banda di fundacion nan y di e Godparents.”