Durante un discurso di fin di aña 2022, prome minister Evelyn Wever-Croes a trece dilanti diferente punto di interes unda a enfoca den un aña cu a trece hopi cos bon, pero tambe hopi reto pa mundo henter.

Aña 2022 lo pasa pa historia como un aña caminda cu sucesonan internacional a crusa fronteranan, causando impacto fuerte den tur pais na mundo y na Aruba tambe. Sea ta riba tereno di salud, di cambio climatico, tereno Financiero-Economico of Social.

Na comienso di e aña aki, e variante di Covid-19, Omicron a extende e pandemia y cu esaki, a tranca recuperacion economico mundialmente.

Mientras Aruba tabata lucha pa sali di e gara di e pandemia, dia 24 di februari, Rusia a invadi Ucrania y a inicia un guera den Europa cu miyones di hende mester a huy, bay biba den otro paisnan di Europa.

Un crisis di energia a sigui e invasion y hunto cune e crisis di inflacion y su efectonan economico devastador rond mundo, aña 2022 ta tipifica di un crisis pa otro.

Tur e sucesonan aki tabatin y tin ainda, un efecto grandi aki na Aruba tambe. Sin embargo, no obstante e efectonan y e sucesonan mundial, a pesar di e olanan grandi cu a surgi, prome minister a sigura cu Gobierno di Aruba a sigui atende cu maximo responsabilidad e asuntonan importante pa tene Aruba riba e rumbo di recuperacion. Y awe, mirando back riba 2022, mi por bisa cu gratitud y un gran orguyo cu Aruba a logra surpasa e retonan, y tin un recuperacion impresionante.

Pa loke ta trata, Asuntonan General y Infrastructura, prome minister a splica cu den aña 2022 e ministerio cu su persona ta lidera a dedica hopi energia na optimalisa funcionamento di aparato gubernamental, y e prome cambionan a wordo implementa prome di januari. Tambe nan a traha riba elimina atraso den procesonan pa por stimula economia, buscando semper e balansa entre desaroyo y conservacion di naturalesa.

Den cooperacion cu sector priva, ta desaroyando un proyecto di vivienda pa 330 famia. Pa brinda mas siguridad den trafico, a construi varios rotonde, entre nan esun di Palm Beach, creando un situacion mas sigur pa turistanan y pa localnan

Den ministerio di Finanzas y Cultura, manera a indica caba, a haci un trabou serio y maneho financiero solido loke a evita un “aanwijzing”, un instruccion, di Hulanda den 2022; a sigui baha gastonan di gobierno, y a cumpli cu empleadonan publico cu a contribui sacrificando 12,6% di nan salario.

Esaki a crea surplus pa 2023 y a mantene credibilidad financiero di Aruba cerca inversionista. Aruba su maneho financiero firme y prudente a wordo reconoci den Reino y pa instancianan financiero internacional, y perspectivanan ta mustra bon, pa fortalece recuperacion, pa crea un base solido y sostenibel pa paga debenan y sigui recupera, minister Xiomara Maduro a anuncia e Plan di Impuesto 2023 cu un rebaho importante di tarifanan di impuesto riba salario y pensioen.

Den area di Husticia y Asuntonan Social, a informa cu tur departamento den Ministerio di Husticia y Asuntonan Social, a haya mas material pa por eherce nan trabou miho. Tambe a inverti den camara di siguridad na Cuerpo Policial, ekiponan pa brinda prome auxilio na ciudadanonan, renobacion di e infrastructura tecnologico na Directie Sociale Zaken; un truck nobo pa brandweer y renobacion di e post di Brandweer na San Nicolas. Pa aumenta siguridad den e pais a ehecuta fase 1 di e proyecto ‘camera surveillance’ den area di hotel, y otro aña ta ehecuta fase 2 y 3. Ademas, a adkiri e di tres radar y e radarkamer tin awor tecnologia completamente nobo.

A sigui cu esfuersonan pa combati abuso sexual, pa prome biaha tin un medico forensico, tambe a cera un MoU entre tur profesional, a organisa opleiding pa tur zedenrechercheurs y psicologonan den cadena hudicial y a enfoca riba prevencion cu e proyecto “mi mesun heroe”.

Minister Rocco Tjon a enfoca riba salud mental, a uni forsa di diferente organisacion den Stichting HUNTO, den cual segun nan ta trahando pa baha e listanan di espera y recientemente a aproba e proyecto pa ‘beschermd wonen’, pa brinda vivienda digno pa esnan cu problema di salud mental cu no por biba na cas mas.

Den turismo y salud publico, a menciona cu turismo e aña aki a yega nivelnan di prome cu pandemia, cu recuperacion di 100%. E bon noticia ta cu turistanan ta gasta mas cu prome cu pandemia. E aña aki a sigui inverti den upgrade y embeyece producto Aruba. Tambe minister Dangui Oduber a anuncia e proyecto di Portcity, Baby Beach y Rodgers Beach na San Nicolas, trapinan di Hooiberg y Rodgers Beach, y e proyecto Gateway 2030 na airport ta den pleno ehecucion.

Riba tereno di salud a uni esfuersonan di Hospital y Imsan den un acuerdo di cooperacion, Arubig a bira un realidad pa reconoce e yiunan di tera den cuido, y a cuminsa ehecuta e plan nacional di prevencion. Ademas traha un roadmap pa garantisa sostenibilidad di e fondo di AZV y mes momento a haci inversionnan den cuido cu 2 ambulance nobo, den Imsan y Hospital pa mehoracion di calidad di cuido y pa reduci lista di espera.

Den Transporte, Integridad, Naturalesa y Asuntonan di Adulto Mayor, minister Ursell Arends a pone esfuerso pa cera e dump di Parkietenbos for di 1 di januari. Prome minister a bisa cu esaki lo trece alivio considerabel pa e bario y su habitantenan. E responsabilidad pa cu limpieza di Aruba awor ta den man di tur hunto.

Riba tereno di integridad a concentra riba transparencia y conscientisacion. A organisa training pa tur hefe di departamento, y pa miembronan di hunta di directiva y di comisario di entidadnan semi-publico.

Ademas, a institui Directie Ouderenzaken, cu lo ta encarga cu maneho riba tereno di bienestar di adultonan mayor.

Tambe a cuminsa cu preparacionnan pa celebra 100 aña di aviacion otro aña. Aviacion ta e porta pa e unico pilar economico, y ta hayando e atencion cu prioridad di e minister.

Minister di Enseñansa y Deporte Endy Croes ta trahando riba e leynan di enseñansa tanto modernisa esnan existente y traha e leynan cu falta manera LV Beroeps Onderwijs y LV pa Inspectie Onderwijs.

Tambe ta trahando riba un data base pa conecta tur scolnan riba un sistema pa asina den futuro por tuma decisionnan a traves di data. Den 2022 a inicia remodelacion di St Aloiysius School, y a logra swap scolnan Reina Beatrix y Paso pa Futuro, alumnonan di scol Reina Beatrix ta bou un solo dak y tambe a firma un contract di 5 aña cu Zweminstructeurs pa prome biaha den mas di 20 aña.

Igualmente a lansa Weganan Escolar Aruba cu tabata un exito rotundo, y e strea Denzel Dumfries tabata presente pa e apertura. A premia deportistanan di aña 2019 y 2021 den Premio Excelencia den Deporte. A inicia renegociacion di e contract di Lotto pa Deporte. A anuncia y firma oficialmente pa e renobacion di Stadion Guillermo Prospero Trinidad na Dakota.

Den area di Asuntonan Economico, Comunicacion y Desaroyo Duradero minister Geoffrey Wever a anuncia e prome fase di revitalisacion di Oranjestad, cu ta un proyecto di embeyecemento di Wilhelminastraat cu mas mata, mas luz y mas parkeo, haciendo e area aki un area agradabel pa nos localnan y turistanan por bishita.

Tambe ta modernisando y digitalizando full e vestigingsbeleid pa negoshi, haciendo e mas facil pa haya un vestigingsvergunning, kitando hopi rekisito y haciendo esaki completamente digital, y specialmente dirigi na desaroyo di e centro di Oranjestad y San Nicolas.

Den e parti di Labor, Energia y Integracion, a informa cu e aña aki a logra aumenta salario minimo, pa yuda ciudadanonan combati e costo di bida halto, prome minister a declara cu minister Glenbert Croes a haci hopi esfuerso den 2022 pa pone hendenan y specialmente e hobennan, back na trabao, causando asina un reduccion den e cifra di desempleo.

“1500 mama y tata cu famia cu no tabata tin trabou aña pasa, awor tin trabou.”, el a bisa.

Riba tereno di energia, ta continua cu esfuersonan pa depende menos di crudo, a traha riba e expansion di proyecto Molina di Biento na Rincon.

E prioridad den e transicion energetico ta pa cuida medio ambiente pa futuro generacionnan, introduciendo mas energia renobable, e vision ta keda energia pagabel y limpi pa e pueblo.

Pa mas tarda februari 2023 nan lo anuncia e continuacion di e reactivacion di e Industria di Energia riba e zona di e refineria cu ya a cuminsa cu e proyecto di Eagle LNG.

Pa 2023, nan ta mira un aña nobo cu hopi optimismo, cu oportunidadnan nobo, pa crea progreso y bienestar pa tur ciudadano.

Atrayendo inversionnan nobo, pa diversifica economia, specialmente riba tereno di energia, pa asina hunto cu e pilar di turismo, brinda Aruba e stabilidad necesario pa no solamente ‘bounce back’ di e crisisnan, pero pa ‘bounce forward’, pa recupera mas fuerte y resiliente.

.

Den union lo haci Aruba mas sigur, y brinda apoyo na tur cu mester di dje den un forma of otro.

P’esey nan ta decreta aña 2023 como aña di “Union y Positivismo” pa hunto lo atende cu e retonan nobo creando solucion , oportunidad y un base solido pa progreso y felicidad pa un y tur den comunidad, prome minister a finalisa.