Como 17 persona a muri y hopi hende a keda herida den un accidente cu a sucede riba caretera noord di ciudad di La Paz, Bolivia. Segun polis, e accidente ta esun mas grave cu a pasa te awor na 2017 na Bolivia.
“Un desenlace fatal a sucede cu un bus di servicio publico di Bolivia cu a perde control y a cay di un baranca; eynan a muri 17 hende den e impacto”, Erick Paniagua , sub- comandante di polis a informa. E accidente a pasa dialuna riba un caminda cerca di Lago Titicaca, unda un bus a cay di un baranca pa supuesto exceso di velocidad.
Na luna di januari a sucede un accidente similar, ora cu un bus a cay den un precipicio lagando 13 hende morto y 32 persona herida. 53% di accidente di transito na Bolivia ta pa motibo di imprudencia di nan chauffeur, segun dato di Instituto Nacional di Estadistica. E di dos causa ta exceso di velocidad cu un 14,8%.
Cerca di 1300 persona ta muri cada aña den accidente riba caretera na Bolivia, lagando tambe cerca di 15 mil persona herida.
