(RFI) – Aña 2023 ta cuminsa cu un halto al fuego bilateral, y di forma simultaneo, entre Estado y cinco organisacion arma: tres di origen guerrillero y dos di origen paramilitar.
Den su prome tuit di aña e presidente Colombiano Gustavo Petro a anuncia cu a acorda un halto al fuego di seis luna cu e principal gruponan arma di e pais.
“Nos a acorda un halto al fuego bilateral cu ELN, Segunda Marquetalia, Estado Mayor Central, AGC (Autodefensa Gaitanista de Colombia) y Autodefensa de Sierra Nevada for di 1 di januari te 30 di juni 2023, cu por haya un extension segun avance di e negociacionnan,” e mandatario a indica dia 1 di januari ultimo.
Di e forma aki, Petro ta duna un yamada ambicioso caminda na e “paz total”, aunke e ta mantene solamente negociacionnan oficial cu Ehercito di Liberacion Nacional (ELN).
Den pasado, algun acuerdo a resulta failliet debi na e imposibilidad di nan verificacion y fortalecemento di algun grupo arma despues di alto al fuego.
Incluso, ex-presidente Juan Manuel Santos, ken a logra e paz cu guerrilla di FARC, na e momento ey a tene combersacionnan den memey di algun enfrentamento.
Apertura di Frontera cu Venezuela
Colombia y Venezuela dia 1 di januari ultimo a habri e brug Atanasio Girardot, tambe conoci como “Tienditas” cu a permanece cera durante casi 7 aña, esaki den un etapa clave di mehoracion di relacion entre e dos nacion cu ta comparti un frontera di mas di 2.200 kilometer.
For di e prome dia di e aña aki, e autonan particular a cuminsa crusa e bruga entre Colombia y Venezuela pa prome biaha durante varios aña.
E delegacionnan lidera pa e minister Colombiano di Comercio, German Umaña y e gobernador di estado Tachira Freddy Bernal, a reuni den e centro di e brug pa e ceremonia di apertura.
“For di awe, tur paso fronteriso ta habri pa transporte”, Bernal a bisa y a agrega cu ta existi e boluntad politico pa sigui mehora e relacion entre e pais bisiña.
