Den un entrevista cu Taekwondo Coach Monica Pimentel, el a conta Bon Dia Aruba con aña 2022 a bay pa loke ta e deporte di Taekwondo na Aruba y kico ta e expectativanan, y proyectonan pa otro aña.
“E aña aki tabata hopi druk, despues di dos aña di Covid, tur cos a cuminsa y tabata echt hopi druk tanto na Aruba como afo cu e competencianan,” Pimentel a remarca. El a splica cu e aña aki tabatin varios logro, pero esun di mas grandi ta e medaya Panamericano di Anabella Fernandez, cu a logra den categoria cadette, cual ta un medaya continental pa Aruba.
Pimentel a splica cu nan a sera un grupo cu ta biahando internacional y esaki ta e Taekwondo Team Aruba. Den e grupo aki nan ta stroom door e muchanan cu ya tin nivel halto nacional pa cuminsa competi internacional.
El a sigui splica cu a cuminsa cu e ekipo aki, un proyecto, di Taekwondo Team Aruba pa duna nan otro nomber pa asina nan por haya mas exposicion. “Nos a traha logo nobo, e muchanan tin nan uniform y asina nan ta mas reconocibel tambe.”
Pimentel a biaha tambe cu e rumannan Klaber, Joshua y Jourde Klaber, cu ta den seleccion di Aruba pa diferente competencia. El a comenta cu e preparacion di e rumannan Klaber ta mas extenso, nan tin hopi mas competencia y e metanan ta un tiki mas den nivel grandi.
“E aña aki nan a haci varios competencia chikito na Merca y tambe competencianan di nivel di ‘ranked tournaments’ y nan a hasta participa den e mundial,” el a agrega.
Overall Pimentel ta considera cu 2022 tabata un bon aña pa e deporte di Taekwondo na Aruba. “Mirando cu nos tabatin dos aña para basicamente, e ta un bon comienso pa e aña aki cuminsa back cu tur cos. E aña aki tabata hopi druk, mi ta wak cu otro aña ta bay ta mas druk ainda,” el a remarca.
Pa loke ta otro aña pa entre otro e rumannan Klaber, Pimentel a indica cu nan tin clasificatorio pa weganan Centroamericano, clasificatorio pa weganan Panamericano, nan ta bay tin mundial atrobe y hopi competencianan grandi pa nan afo.
El a menciona cu den februari mes tin tres competencia tras di otro, tres siman tras di otro cu competencia na Miami, Costa Rica y Las Vegas.
Ademas di esey, Pimentel a splica cu tin riba schedule tambe pa nan un training camp na Korea. Despues di nan tin un grupo cu ta e ‘black belts’, cu ta mas tanto categoria junior y cadette. Den e grupo aki tin mas tanto mucha muhe cu a desaroya hopi bon e aña aki y pa otro aña nan ta spera cu nan ta bay trece medaya den nivel Panamericano y mas bon resultado.
Despues di e grupo aki tin e ‘color belts’ y esaki ta muchanan cu ta sobresali caba ariba nivel nacional. Pimentel a splica cu nan ta bezig ta selecciona nan pasobra aworaki tin hasta Panamericano infantil cual a cuminsa e aña aki y otro aña tine tambe, dus e competencia ta cuminsa na un edad hopi jong caba.
Por ultimo Pimentel a gradici pueblo di Aruba pa nan apoyo durante aña 2022. “Nan a yuda hopi den e parti di colecta, cual ta hopi importante pa nos por yuda e muchanan biaha pa nan cumpli cu nan metanan deportivo,” el a resalta.
