Fundacion Rancho ta un NGO ubica den curason di Oranjestad for di aña 2010 cu tin e meta di conserva historia y cultura di e bisindario di Rancho, na aña 2022 a conoce un cambio significativo y pa proximo aña tin den nan obhetivo enfoca mas riba e parti social.

Den aña 2022 e fundacion mester a move di un caminda pa otro loke a causa un impacto grandi pa nan por a por realisa nan mes durante e seis ultimo luna di aña, aunke e presupuesto no a cambia nan mester a restructura un poco mas.

Awor cu nan ta ubica na Visstraat 1 un espacio mas comodo y mas grandi segun Clifford Rosa presidente di Fundacion Rancho a splica na Bon Dia Aruba, esey ta duna nan un bista diferente di unda e organisacion ta para despues di 12 aña, nan ta na banda di Museo Arkeologico e caminda unda nan a nace como informacion pero eynan tambe nan a mira cu e informacion ey tin un balor no solamente educativo sino tambe monetario.

Basa riba e balor monetario aki, Rosa a señala cu esey ta lo cual nan kier sigui explora y ehecuta den proximo aña 2023 debi cu nan ta un fundacion sin animo di lucro y sin subsidio di gobierno, pero cu un movecion academico den e comunidad di Rancho.

Pa via di falta di recurso, nan a keda corto den aña 2022 specificamente na luna di augustus ultimo unda e administracion a para y nan no por a continua sigui haci cierto proyectonan structura como por ehemplo cu Scol Practico Ofishi (SPO) den e contexto di hardin y Hof’i di Rancho cu ta un programa cu ta forma parti di e proyecto “Foodsecurity” di Fundacion Rancho co-financia pa Samenwerkende Fondsen Cariben.

Den e trayecto di mudamento na e awor conoci como ‘Centro di Actividad Rancho’ e alumnonan a yuda reconstrui Hof’i Bario Rancho na Visstraat bou guia di Rosa y Ginelly Quandt ken ta fungi como boluntario, nan a construi baki di mata den espacio nobo, planta mata y haci trabounan di mantencion den e hofi.

Un di e actividadnan di Fundacion Rancho tabata cu na luna di november nan a intercambia pensamento y informacion cu Dr. Isabel Márquez-Pérez y colega cu a bin di bishita riba e isla pa e workshop organisa pa Islanders at the Helm. Un di e tradicion cu isla Aruba y San Andres (Colombia) tin comun ta tradicion di Boto Miniatura, e meta di esaki ta pa Stichting Rancho y Sea, Land & Culture Old Providence Foundation por traha hunto den futuro.

Na luna di april nan a haya bishita di alcalde di Uribia, Colombia, Bonifacio Henriquez, un bishita cu Rosa a menciona cu tabata den contexto den celebracion di 12 aña di existencia di e fundacion pa asina estrecha lasonan tambe entre Aruba y La Guajira. Na luna di mei nan a ricibi e bishita di secretario di Estado Alexandra van Huffelen, entre otro mandatarionan.

Pa aña 2023 nan ta keda enfoca riba conscientisacion, educacion y proteccion di herencia, ademas den loke ta trata e topico di sclavitud unda cu Rosa tambe a señala cu nan a wordo invita pa Vertegenwoordiging van Nederland in Oranjestad (VNO) pa bay Corsou y participa den un conferencia di “Slavernijverleden” dia 23 di november ultimo pa dialoga riba e tema di sclavitud na Aruba y otro islanan di Reino Hulandes.

Di esaki, nan ta bay continua duna charlanan tocante e pasado, presente y futuro di sclavitud cu tin di haber cu un materia di Reino unda Aruba tambe ta involucra den dje, ademas di esey nan a cuminsa caba cu e proyecto Fo’i Lama unda tur diasabra nan ta bende pisca cu pan bati y asina ey nan a haya movecion comercial den e luga nobo, igual cu e Marshe di Rancho cu probablemente lo conoce un cambio den proximo aña mirando e dianan cu ta wordo organisa y cu kisas lo bira pa diasabra en bes di ultimo diahuebs di luna manera e tabata prome.

Na cuminsamento di aña nan ta bay lansa oficialmente e logo di 200 aña di Oranjestad den cual pa henter aña nan ta bay informa y educa e hendenan tocante kico nan ta bay celebra na 2024 ora e capital lo cumpli su 200 aña.

Na Januari lo tuma luga e caredanan di boto di miniatura algo cu ta forma parti di herencia material y cultural manera Rosa a sigura y cu lo tuma luga dia 25 di januari, na februari nan ta bay tin un workshop di boto miniatura, april lo tin un actividad pa celebra 13 aña di e fundacion, entre otro.

Nan ta gradici nan Mondriaan Fonds pa cu e proyecto di Oda na Piscado, un proyecto cu ta bay sigui cu investigacionnan, entrevistanan cu comunidad y piscadonan di Rancho y di Aruba pa asina ey tin mas material pa exposicion di aña 2023.

Asina ey tin hopi mas idea pero e necesidad di haya mas fondonan pa haci proyectonan cu mas impacto ta keda pa e fundacion.

Peticion pa solucion di problemanan social den area di Rancho

El a trece dilanti cu den area aki nan ta mira cu tin mas problemanan social, nan ta ubica cerca di forno di Kalki e cual ta un icono di e fundacion “mester di mas atencion rond di e forno, for di edificio nobo nos ta wak tur dia tur e problematica social di Oranjestad ta move den bisindario aki, pa nos e ta un tiki fastioso y nos ta mira un solucion pa esey tampoco”, Rosa a expresa.

Pa e motibo aki el a haci un yamada na autoridadnan pa duna un atencion mas profesional na e adictonan ambulante cu tin den area, “mester di atencion pa nan”, el a finalisa.