Herrick Henriquez, director di ATIA: “Nos tur tin cu bay scoge unda nos ta bay gasta nos placa”

Manera informa den dianan aki, ta bay tin aumento di prijs for di dia 1 di januari pa pan blanco, webo produci localmente y otro productonan di canasta basico, ademas den impuesto di BBO y productonan petrolero. Pa cu esaki ATIA a trece cierto puntonan dilanti den cual a sigura cu e situacion “ta hopi preocupante”.

Herrick Henriquez, director di Aruba Trade and Industry Association (ATIA) a sigura pa Bon Dia Aruba cu aumento di BBO ta bay afecta tur prijs na Aruba. Nan tambe a wak aumento den productonan di canasta basico y combustibel, unda tur prijs ta subiendo “y esakinan no ta decisionnan di comercio pa haci, esaki ta directamente efecto di gobierno cu ta haciendo e decisionnan aki pa aumenta tur e tarifa,” Henriquez a señala.

Nan ta mira cu esaki tambe efecto di BBO cu ta bay subi na 7% segun gobierno a afirma, pero organisacionnan manera Comerciantenan Uni y ATIA ta indica cu e cifra real ta 7.5% pa motibo cu nan no a cambia e manera con pa calcula e BBO. “Nan tabatin chens pa haci esey y no a wordo haci,” Henriquez a bisa.

Otro punto cu nan a ripara ta cu “ta purba bende e cosnan cu pa nan ta hopi positivo, por ehemplo e subida di reparatietoeslag cu ta cosnan cu nos ta support, cu hendenan ta bay haya mas placa den nan saco. Pero mas placa den bo saco na final di dia no kiermen cu bo poder di compra a subi. Nos ta sinti cu e subida di e prijsnan cu e incentivo cu ta wordo duna awor, no ta bay cubri e subida di prijs di awa, coriente of gasolin.”

El a trece dilanti cu gobierno a sigura cu 30.000 persona no ta bay paga inkomstenbelasting, “pero si bo haci e calculacion di cuanto e personanan aki ta bay scapa, nan ta bay scapa aproximadamente 130 florin pa aña, ekivalente na 11 cu 12 florin pa luna. Esey no ta bay cubri e subida di BBO y tur e otro medidanan cu ta haci cu prijsnan ta bay subi. Gobierno ya caba ta bisando ta comerciantenan ta subiendo e prijs, pero e no ta asina, un comerciante ta den business pa haci trabou, nan tambe mester di placa y cash flow pa sigui nan business. Niun comerciante ta un stichting cu nan no kier purba di haya un tiki ganashi, e ganashi ta bin door di bende hopi producto y no tiki producto na un prijs hopi halto,” Henriquez a señala.

For di varios luna ATIA ta bin publicando varios comunicado riba medionan di comunicacion y riba rednan social pa asina conscientisa over di esaki. “Comercio ta consciente over di kico ta bay pasa, pero politicamente nan ta purba bende cu ta comercio ta subiendo e prijsnan; pero tur e subidanan di prijs, vooral esun di awor, ta bin door di aumento di BBO.” el a bisa.

Nan ta spera cu mundialmente prijsnan di carga ta bay baha manera a bin tumando luga algun dia pasa, loke ta algo positivo pa e prijsnan, pero pa cuminsamento di aña nan ta wak cu esey no ta bay pasa mas y nan ta sinti cu prijsnan ta bay keda subi ademas di e efecto di BBO cu ta bay tin.

“Mi ta kere cu 2023 ta bay ta un aña di hopi reto pa Aruba y mi ta sigur cu nos ta surpasa, pero nos tur tin cu bay scoge unda nos ta bay gasta nos placa. Nos tin cu spera cu turismo ta keda bin Aruba, pasobra mundialmente tambe ta papiando di un recesion vooral na Merca cu ta un di nos mercado mas grandi. Esey por nifica menos placa pa e saco di nos posibel turistanan, definitivamente ta bay ta un aña di hopi reto pa Aruba,” Henriquez a afirma.

Como comerciantenan nan ta hopi preocupa pa motibo cu efectonan lo yega na Aruba tambe y nan kier sigui haci nan trabou pa por brinda na nan clientela e servicio y productonan miho. Pero Henriquez ta sigura cu mester corda semper cu prijs di un producto no ta mescos cu ora ta wordo compra riba internet. “Esaki tin hopi mas efecto y tin mas cosnan den dje cu ta bin cune como impuesto, shipping, empleadonan si tin y esey no por wordo compara.”

Den un comunicado, nan a splica cu BBO ta un sistema cu comercio ta administra manda e pago nan pa DIMP y nan tin cu revisa si esaki ta corecto, y ainda asina Aruba tin 60% di cumplimento cu e ley. Pues cu e medida aki ta di puntra kico exactamente kier yega na dje, paso mas cumplimento nos expertonan no ta mira cu esey lo pasa. Nos expertonan ta splica nos cu awo basicamente tin un BBO na frontera no solamente pa producto, pero tambe pa servicionan, sin cu por cobra e Impuesto bek di Departamento di Impuesto, efectivamente creando un schakel extra pa cobra BBO. Efectivamente Aruba ta expandiendo su derecho pa por cobra impuesto di companianan cu ta bende producto of duna servicio na Aruba.

E medida aki ta trece hopi gasto extra pa comercio di Aruba. Por ehempel, mester pensa riba banconan, cu ta usa servicionan y licencianan international pa procesa transaccionnan, awo lo mester bay paga un BBO riba cada transaccion. Esaki lo costa miyones pa banco nan, no solamente pa manda un pago corecto pa Departamento di Impuesto (DIMP) tur luna, pero tambe tur e cambionan cu mester haci den nan sistema pa administra tur e miles di transaccion diario. Asina tin hopi mas ehempel cu por bin cune pa sector di IT, accountants, mercadeo, etc, cu tin licencianan international.

Pa finalisa, Henriquez a laga como mensahe: “Pueblo di Aruba mester ta consciente di esey cu un subida di loke nan ta papia 1% ta afecta e prijsnan local directamente, sea consciente di esey tur comerciante ta purba di wanta nan prijs te unda nan por posibel, pero nos tur ta bay sinti’e den nos saco e aña aki como consumidor. Nos florin no ta bay cumpra mesun cos cu tabata cumpra ayera.”