Ayera riba rednan social por a tuma nota di un caso sumamente lamentabel cu a tuma luga den centro di ciudad. Ta trata aki di un turista crucero cu tabata di bishita na Aruba. Na final di su dia na Aruba, e turista a wordo agredi pa tres persona y a lag’e gravemente herida.

E portal local di noticia 24ora a reporta e caso lamentabel aki, na unda e famia di turista, procedente di Canada, mester a termina nan vakantie di manera abrupto y di un manera traumatico debi na e incidente cu casi a costa bida di un di e integrantenan di e famia.

Segun e homber cu a wordo agredi a conta, despues di un dia hopi agradabel e tabata regresando e auto cu nan a huur na e parkinglot patras di e waf di crucero. Mientras e ta wardando pa entrega e auto back, e ta papiando cu e persona encarga na telefon y tres homber y un muhe den un auto a reverse y dal otro auto. E personanan aki a kere cu e turista tabata grabando nan, y na e momento aki e tres homber a baha y cuminsa agredi e turista.

“Mi no a spera di pasa esaki na Aruba. Nan a bisa mi cu e hendenan na Aruba ta amigabel, pero mi tabata ekiboca. Lastimamente esaki tabata nos vakantie di Pasco y aworaki el a caba. Mi mester bay opera mi cara,” e turista a bisa na 24ora.

E casa di e turista a agrega cu danki na e persona di e car rental cu a yega na momento cu nan tabata agrediendo su casa, e hombernan a stop y a huy. “Esey ta e unico cos cu a salba mi casa su bida. E tin multiple fractura, tur cos ta fractura y e mester bon cuido y no tin nada na e isla cu por yud’e.”

E casa di e turista a splica tambe cu na principio, ora cu nan a haya su casa y nan a bay back riba e crucero, agente policial a subi e crucero y cu nan no tabata hopi cooperativo. Segun el a sigui splica e agente policial a informa nan cu ta bay ta hopi dificil pa haci un rapport, pasobra nan ta riba crucero y nan no ta keda riba e isla.

“Ami a bisa cu si esey mester pasa, e ora nos lo keda riba e isla. Ademas e hecho cu e tabata den asina un mal estado, niun hende no por a yuda y nos no kier a core riesgo, dus nos a dicidi di keda. Y despues a tuma hopi tempo prome cu nan a yuda nos,” e turista a indica.

Por ultimo e dama turista a remarca cu nan no ta kere cu nan lo bolbe bishita Aruba den futuro. “Mi no ta kere ta un bon idea despues di e evento traumatico cu nos a pasa.”

Bon Dia Aruba a tuma contacto cu Minister di Husticia, Rocco Tjon, pa puntra su reaccion ariba e suceso aki, con lo trata e caso aki y kico lo haci pa sigura otro turistanan cu Aruba ta un luga sigur pa bishita.

Minister Tjon a enfatisa cu nan ta lamenta e caso aki. “Cada caso of incidente ta uno di mas. Mi a combersa cu Korspchef riba e caso aki y el a sigura mi cu Cuerpo Policial a pone tur recurso disponibel pa resolve e caso aki mas liher posibel. Recherche ta atende cu e caso aki, na mesun momento lo percura tambe pa e famianan wordo informa debidamente di e progreso,” Minister Tjon a indica.

El a agrega cu Aruba ta un di e destinacionnan mas sigur y p’esey turistanan ta scoge pa bin bishita Aruba. Pa sigui fortifica e posicion aki, nan ta sigui inverti den proyectonan pa e seguridad den areanan turistico. P’esey fase 1 di e proyecto di camara ta kedando cla, instalacionnan di camaranan ya caba ta tumando lugar den area hotelero y fase 2 y 3 lo sigui na 2023.

Banda di esey tambe Tjon a remarca cu hunto cu ATA y AH&SF nan ta trahando pa introduci e proyecto di colaboracion entre sector priva y Cuerpo Policial, pa amplia vigilancia y presencia policial den areanan turistico. Si tur cos ta bon e proyecto ey tambe lo wordo realisa na 2023.

Por ultimo el a agrega cu e personanan responsabel lo wordo investiga y persigui cu tur peso di ley.

Bon Dia Aruba a tuma contacto tambe cu Minister di Turismo, Dangui Oduber, pero no a logra haya respuesta prome cu e ciere di nos edicion.

Potret di ilustracion.