(AP) — Lider Nort Koreano, Kim Jong Un a presenta plannan nobo pa reforsa su poder militar proximo aña na un reunion di oficialnan politico top, segun medionan di comunicacion estatal a reporta ayera, den un indicacion cu e ta bay continua cu su racha provocativo di despliegue di arma.
Declaracion di Kim a yega mientras animosidad cu rival Sur Korea a aumenta drasticamente e siman aki, cu e Sur acusando e Nort di bula drone a traves di e frontera pa prome biaha den cinco aña. E aña aki, Nort Korea ya a haci un cantidad record di test di misil, den loke expertonan ta yama un intento pa modernisa su arsenal y mehora su posicion den futuro acuerdonan cu Merca.
Durante e sesion diamars na e reunion plenario andando di e Partido Labor den gobierno, Kim a analisa retonan nobo di seguridad den politica internacional y riba Peninsula Koreano, y a clarifica principio y direccionnan pa tuma den relacionnan externo y lucha contra enemigonan pa protege interesnan nacional y soberania, segun Agencia Noticiero Central Koreano.
Algun observador ta bisa cu e obhetivonan nobo por ta relaciona cu e impulso di Kim pa expande su arsenal nuclear y adkiri sistemanan di tecnologia halto di arma, manera misilnan ‘multi-warhead’, un arma mas agil di distancia largo, un satelite spion, y drone avansa. Nan ta bisa cu Kim eventualmente lo usa su poder nuclear reforsa pa forsa su rivalnan pa acepta e Nort como un estado nuclear legitimo, un status cu e ta considera esencial pa eliminacion di sancionnan internacional.
Bao di un plan di cinco aña pa reforsa arsenal di arma anuncia ayera, ministerio di Defensa Sur Koreano a bisa cu ta bay pusha pa reforsa su sistema conoci como “tres axis” – atake preferencial, defensa di misil, y capacidad di atake vengativo – pa por combati e menasa nuclear Nort Koreano. Pa haci esaki, a bisa cu ta bay procura pa mas stealth fighter jet y submarino capaz di lansa misil balistico, opera misil interceptor y radar adicional, y desaroya armanan mas poderoso, cu guia preciso.
A bisa cu Sur Korea tambe ta bay adkiri diferente tipo di drone pa reforsa su capacidad di vigilancia.
