(AP) – E video di un homber ta abusa sexualmente di su yiu muhe di 9 aña a ser descubri na New Zealand den aña 2016 y a causa un buskeda global pa e mucha aki.

Investigadornan a contacta Interpol y a persecucion eventualmente a inclui FBI, U.S. State Department y Department of Homeland Security. Lunanan despues, e investigadornan a drenta e cas di Paul Adams, a aresta su persona y a rescata e mucha den e video ademas di su 5 rumannan.

Mientras cu Adams no por causa mas daño fisico na su yiu, e videonan ta sigui biba, cu download y upload di fanaticonan di pornografia infantil rond di Merca y henter mundo, birando cada biaha mas popular mientras cuerpo policial, fiscalnan y companianan di internet ta sigui haci nan esfuerso pa kita e imagennan aki.

E cantidad di biaha cu e video di Adams a ser mira a aumenta di menos di 100 den aña 2017, na 4,500 den aña 2021 segun data cu The Associated Press a ricibi cu permiso di e victima y su mama adoptivo, Nancy Salminen. E cifra aki a ser produci pa National Center for Miissing and Exploited Children, un fundacion cu ta monitor pornografia infantil riba internet y ta traha u agencianan policial den henter mundo.

“Esaki ta e parti hororoso di tur cos,” Salminen a comenta. “Bo no por bisa cu esaki ta den pasado, cera e porta y sigui cu bo bida. Nunca e lo por bira lomb pa loke a pasa.”

E victimisacion continuo di e mucha aki por a ser evita.

6 aña prome cu e video aki a surgi na Auckland, Adams, miembro di Church of Jesus Christ of Latter-day saints, conoci momo iglesia Mormon, a confesa cu el a abusa di su yiu, ken a ser identifica como MJ pa AP.

Sinembargo un abogado prominente di misa a bisa pa mantene e abuso aki un secreto, y como resultado di esaki MJ a ser brutalisa pa 7 aña mas. Awe, te ainda e ta victima pero di otro manera, pa motibo cu e video y otronan cu Adams a graba te ainda ta circula riba internet. E data cu a provee na AP tambe a mustra cu cuerpo policial na Merca a referi na e video di Adams na NCMEC pa identificacion 1,850 biaha desde cu esaki a ser descubri, contribuyendo na casi 800 aresto pa cu cargonan di pornografia infantil solamente aña pasa.

E inmortalidad die video di Adams ta delinea e limitenan di investigacion via internet pa e red global di investigador cu ta coriendo pa stop pronografia infantil riba internet, y ta revela con avancenan den warda data y tecnologia di video a cana hopi mas lihe cu e esfuersonan pa stop esaki.

Kita imagen for di internet permanentemente ta practicamente imposibel, segun expertonan di abuso sexual di mucha, pa motibo cu personanan di pornografia den henter mundo constantemente ta download imagennan, warda nan y ta bolbe publica nan. “Esaki ta loke ta haci e tipo di crimen aki pio,” Simon PEterson a comenta, ken ta e agente cu a descubri e video di Adams. Victimanan di pornografia infantil online, el a splica, “tin cu lanta tur dia cu e conocemento cu e imagennan di e temponan teribel aki di nan bida te ainda ta circula, y cu tin hende cu ta mira e imagennan aki pa nan mesun satisfaccion.”

E caso aki tambe a trece dilanti un gran buraco en e leynan di e estado pa cu reporta abusonan sexual contra mucha. Adams, miembro di e misa mormon, a confesa e abuso aki na john Herrod den aña 2010. Na Arizona, e figuranan aki den misa ta entre e profesionalnan cu ta rekeri pa reporta esaki na cuerpo policial of oficialnan di bienestar di mucha.

Sinembargo ora cu Herrod a yama e misa su linea di conseho, Merril Nelson, e abogado cu ta representa e misa a dirigi su persona na sconde e informacion aki for di oficialnan y autoridadnan.

Segun documentonan legal, Nelson, ken tambe ta legislador di Utah, a señala na un excepcion den e estado su ley di reportahe pa cu e abuso aki, unda cu ta permiti e figuranan aki di misa mantene e informacionnan aki scondi si nan a ser revela durante confesion, e asina yama Clergy-penitent Pivilege.

Tras e cortina aki di secretonan dentro di misa, Adams a sigui abusa di MJ, y 5 aña despues a cuminsa abusa di su ruman muhe chikito, for di tempo cu e tabatin solamente 6 siman di edad. Tambe e tabata tuma video y fotografia di e abuso y tabata publica esaki riba internet, incluyendo e video di 9 minuut cu eventualmente a causa su caida.