(AP) — Un ley di presupuesto di $1.7 triyon financiando agencianan general te cu september y dunando mas ayudo na un Ucrania devasta a pasa door di Congreso ayera, mientras legisladornan ta core pa caba nan trabao pa e aña aki, y evita un shutdown parcial di gobierno.
E ley a pasa principalmente riba linea di partido, 225-201. Awo ta bay na presidente Joe Biden pa firm’e como ley.
Aprobacion di e ley a representa un acto di clausura pa Rep. Nancy Pelosi su segundo termino como presidente di Congreso, y pa e mayoria Democrata cu el a lidera na poder den eleccion di 2018. Republicanonan ta bay tuma control di Congreso otro aña, y Rep. Kevin McCarthy ta campañando pa reemplas’e.
Aprobacion di e ley a yega algun ora prome cu financiamento pa agencianan federal ta caduca. Legisladornan a pasa dos medida pa mantene gobierno operando te awo pa e aña presupuestario aki, y un di tres tabata programa pa pasa ayera tambe pa sigura cu servicio ta continua te cu Biden por firma e medida pa henter aña, conoci como omnibus, den ley.
E ley masivo ta mara hunto 12 ley di apropiacion, ayudo pa Ucrania y alivio pa desaster pa comunidadnan recuperando di horcan, inundacion y candela. Tambe ta contene cantidad di cambio di politica cu legisladornan a inclui den e ley final siendo considera pa e Congreso actual.
