(AP) – Un scol medico prominente di California a pidi despensa pa a conduci decenas di experimento medico cu no tabata etico riba por lo menos 2,600 homber encarcela den aña 1960 y 1970, incluyendo pone pesticida y herbicida riba e hombernan su cuero y inyecta esaki dentro di nan adernan.
Dos dermatologo na University of California, San Francisco, un di nan ken te ainda ta na e universidad, a conduci experimentonan riba e hombernan na California Medicla Facility, un hospital prizon na Vacaville, practica cu a ser para den aña 1977.
E Universidad su Program for Historical Reconciliation a entrega un reportahe tocante e experimentonan anteriormente e luna aki, skirbiendo cu e doktternan a participa den “practicanan cu informacion y consentimento cuestionabel” y a haci proceduranan riba hombernan kendenan no tabata tin ningun di e malesanan ni condicionnan cu e investigacion tabatin e meta di trata. San Francisco Chronicle a reporta esaki diaranson.
“UCSF ta pidi despensa pa su rol explicito den e daño causa na e victimanan, nan famianan y nos comunidad pa medio di facilita e investigacion aki, y ta admiti e institucion su rol implicito den motiva e tratamento di poblacionnan vulnerabel di manera cu no tabata etico, sin importa e standardnan legal di e tempo aki,” Dan Lowenstein a bisa den un declaracion.
E reportahe bisa cu tin necesidad di mas analisis pa determina e extento di e dañonan causa na e prizoneronan como resultado di e experimentonan aki y kico e universidad mester haci na respuesta di esaki. “Te ainda nos ta den e proceso di considera e recomendacion y determina e proximo pasonan apropia,” e universidad a bisa den e declaracion diahuebs. “Nos lo haci esaki cu humildad, y un sentimento di ta comprometi na un futuro mas husto, igual y etico.”
Un vocero di California Department of Corrections and Rehabilitation, Daña Simas, a bisa cu oficialnan te ainda no a lesa e reportahe. Sinembargo, e agencia di California Correctional Healthcare Services “ta lucha pa sigura cu e poblacion encarcela lo ricibi cuido di salud apropia cu ta cumpli cu e comunidad su standardnan di cuido y etica,” Simas a skirbi.
E reportahe a enfoca riba investigacion di Dr. Howard Maibach y r. William Epstein. Maibach a sigui su trabao na e universidad y Epstein a fayece den aña 2006. E no tabata inmediatamente cla si Maibach lo ricibi of enfrenta cualkier disciplina pa causa di e reportahe.
