(DiarioLibre) – Un biaha mas, Minister di Republica Dominicana, Roberto Alvaraez a suplica dilanti Conseho di Seguridad di Nacionnan Uni tocante e situacion na Haiti cu tin mester di un forsa internacional pa enfrenta e bandanan criminal cu e meta pa debolbe paz na e nacion.
Den un mensahe di varios minuut, Alvarez a indica cu e bandanan, apoya pa algun parti di e sector politico y militar di Haiti, no solamente ta un atentado contra e trankilidad, si no cu nan ta obstaculisa e combate contra hamber y colera, enfermedad cu a mata mas di dos mil persona desde cu e brote a cuminsa.
“Con por reparti e alimentonan pa alrededor di cinco miyon di persona den riesgo di sufri inseguridad alimenticio agudo na 2023, incluyendo dos miyon di mucha y hoben, di cual aproximadamente 250 mil ta sufri di desnutricion agudo”, e minister a puntra na e coleganan di ONU.
Den e sentido ey, den nomber di e Gobierno Dominicano, e minister a pidi lo mas pronto posibel e intervencion internacional pa combati e bandanan di e pais bisiña.
E pais Dominicano a realisa un cantidad di esfuersonan na fabor di e pueblo Haitiano: suministro di combustibel pa hospitalnan y otro entidadnan; apoyo den seguridad pa transport di e personal diplomatico y atencion di salud gratuito, indicando cu 32.4% di e partonan na e hospitalnan ta di muhenan Haitiano.
Sinembargo el a remarca, cu Republica Dominicana no por carga su so e crisis di Haiti, si no cu e mester sali di e liderazgo Haitiano, pero cu ayudo internacional.
