Minister encarga di Husticia y Asuntonan Social Rocco Tjon mediante su red social a publica un comunicado unda ta informa cu despues di a reuni cu e personal cu ta encarga cu e proyecto di “bemoeizorg” algun tempo atras, minister Tjon a bishita e “inloophuis” diabierna siman pasa.
Manera ta conoci algun luna atras a inicia cu e proyecto pa atende cu adictonan ambulante y den cuadro di esaki a instala un ekipo cu ta dedica solamente na atende cu adictonan cu ta riba caya.
Durante e bishita na e “inloophuis”, pues e luga caminda adictonan ambulante por acudi pa come y pasa dia, e mandatario a logra combersa cu e personal, tocante algun ideanan cu tin pa haci cierto renobacionnan infrastructural. Banda di esaki a combersa tambe riba ideanan cu tin pa loke ta e actividadnan y programa cu por brinda na e adictonan. A base di esaki, a haci palabracionnan concreto pa asina na januari binidero, ora e renobacionnan na Centro Colorado keda cla, reuni bek pa asina priorisa e trabounan pa aña 2023, pa loke ta entre otro e renobacionnan.
Trabounan infrastructural pa loke ta Stichting Hunto na Dakota ta avansando como tambe e proyecto di renobacion na Centro Colorado. Den cuadro di e proyecto di “bemoeizorg” a incorpora fondonan pa e renobacionnan na Centro Colorado, e cual ta encera 16 camber nobo pa por ubica adictonan ambulante.
Si tur cos sigui manera planifica, por bisa cu pa entre januari y februari e 16 cambernan aki lo keda cla.
Por ultimo, e mandatario a indica cu un parti interesante tambe tabata cu a sondea posibilidadnan pa yega na un luga pa hende muhenan so, algo cu nunca tabatin na Aruba. Esaki ta un proyecto cu tambe ta den planificacion pa asina cuminsa prepara y concretisa esaki pa e aña binidero.
