(EFE) – Guerrilla di Ehercito di Liberacion Nacional (ELN) a lanta e “welga arma” cu a cuminsa siman pasa den un region di Pacifico y cu tabata mantene aisla e comunidadnan cerca di e riunan di San Juan y Calima, situa na departamento di Choco y Valle del Cauca, segun fuentenan oficial a informa.
E lantamento di e welga arma, un accion cu ta impedi cualkier actividad comercial of diario na e poblacionnan afecta, ta tuma luga un dia despues cu e guerrilla aki, cu ta negocia un acuerdo di paz cu gobierno Colombiano, a anuncia un alto al fuego di nuebe dia so pa fiestanan di Pasco di Aña Nobo.
“Ta lanta e welga arma awe 20 di december na San Juan y Calima, cu tabata causa impacto den e poblacion civil di Choco y El Valle cu finalmente a wordo scucha, ta un otro gesto di paz cu nos ta reconoce di ELN”, minister di Interior y vocero di Gobierno, Alfonso Prada, a bisa y a insisti cu nan “ta espera mesun cos di esunnan cu ta aspira un dialogo di paz”
ELN e ultimo guerrilla di e pais, a impone e medida aki diahuebs di siman pasa, loke a provoca e aislamento di casi 10.000 persona den cuater municipio di Choco Istmina, Medio San Juan, Sipí y Nóvita, cu ta comunica cu e riunan San Juan y otronan) cu tampoco tabatin acceso na servicionan di salud of pa sali y cumpra cuminda.
Guerrilla a ordena e welga arma despues di un entrada forsa di paramilitarnan Autodefensas Gaitanistas de Colombia (AGC), tambe yama Clan del Golfo, na e comunidad afro di Negria na Istmina, den cual un persona a wordo asesina.
