Dia 5 di december ultimo corte comun a dicta dos sentencia relaciona cu casonan di parehanan di mesun sexo, un na Aruba y un na Corsou, caminda e veredicto final a indica cu parehanan di mesun sexo por casa na ambos isla.
E veredicto aki a ocasiona un ola di reaccionnan tanto positivo como negativo den comunidad. Entre otro e Comision Pastornan Christian a demostar nan malcontento y fraccionnan MAS y Acccion21 a entreha ley na Parlamento di Aruba pa trata matrimonio pa pareha di mesun sexo.
Durante conferencia di prensa dialuna atardi Prome Minister, Evelyn Wever-Croes, contestando pregunta di miembro di prensa a splica cu gobierno a anuncia su posicion algun dia despues di e veredicto y a bisa cu aworaki cu e ta un verdicto di corte, nan mester warda ariba e consehonan. Den un comunicado di prensa nan a indica cu nan a pidi conseho aki na Aruba y un conseho di Cassatie na Hulanda. Wever-Croes a remarca cu prome cu nan tuma decision di establece un cassatie of no, mester di un conseho di casatie.
“Nos ta bezig ta recolecta e consehonan y esey por dura algun tempo. Un conseho di casatie bo no ta haya 1, 2, 3. Nos ta wardando aworaki ariba kico e timeline lo ta pa e conseho aki y despues nos lo consulta cu Parlamento na Aruba y despues nos lo por bisa ki decision nos lo tuma. Casatie of no Casatie”, el a enfatisa
El a subraya cu na e momentonan aki nan ta wardando pa e consehonan. Con largo e lo dura no ta sigur. El a splica cu tin tres luna pa drenta den Casatie. “Mi ta spera cu e conseho di casatie por drenta dentro di un luna y na momento cu nos tin tur e consehonan e ora ey nos por tuma un bon decision. Ami no ta tuma niun decision sin pidi conseho”, Prome Minister a bisa.
