(AP) — Un parada pa celebra e campeonnan Mundial, Argentina a keda cancela rapidamente ayera mientras miyones di persona a subi caya, caretera y brug den un intento caotico pa haya un bista di e team nacional cu a gana un di e finalnan di Mundial mas grandioso den historia.
Asina hopi fanatico feliz ta zwaai bandera a inunda e capital, cu e hungadornan mester a bandona e bus habri transportando nan pa Buenos Aires y subi helicopter pa bula riba e ciudad den loke gobierno a yama un parada aereo. “E campeonnan mundial ta bulando henter e ruta riba helicopter pasobra tabata imposible pa continua riba tera debi na e explosion di felicidad di hende”, vocero di presidente Alberto Fernandez a skirbi riba rednan social.
Despues di bula riba puntonan clave di Buenos Aires unda fanaticonan a reuni, e helicopternan a bolbe e sede di Asociacion di Futbol Argentino pafo di e capital. Algun fanatico a continua celebrando riba caya, mientras otronan a bandona Buenos Aires rabia, kehando cu nan no por a duna respet na e team cu a trece e prome trofeo di Mundial pa e pais desde 1986.
