(AP) — Ehercito Mexicano ayera a aresta ruman homber di e hefe di cartel di droga mas busca, Nemesio “El Mencho” Oseguera, segun Departamento di Defensa Mexicano.
Ehercito a bisa cu a captura Antonio Oseguera den posesion di arma den un suburbio di Guadalajara, capital di estado occidental di Jalisco. A bisa cu el a supervisa accionnan violento y logistica, y a cumpra arma y laba placa pa e hyperviolento Cartel Jalisco Nueva Generacion, conoci simplemente como Cartel Jalisco.
Departamento di Tesoro Mericano ta lista Antonio Oseguera alias “El Tony Montana”, un referencia aparente na e protagonista ficticio di e pelicula di gangster di 1983, Scarface.
Antonio Oseguera ta riba lista di sancion di Departamento di Tesoro pa su lasonan cu e cartel, Sinembargo, no tabata inmediatamente cla si tin un orden di captura Mericano of solicitud di extradicion pa su persona.
Autoridadnan anteriormente a aresta esposa di El Mencho, alegando cu e tabata involucra den actividadnan ilegal di e cartel. Merca a ofrece un recompensa di $10 miyon pa captura di El Mencho, pero e cartel a bringa violentamente contra intentonan pa arest’e den pasado.
Presidente Mexicano, Andres Manuel Lopez Obrador a bisa cu Mexico no tin un politica pa detene caponan di droga mas, pero autoridadnan a bay la tenientenan di algun cartel, incluyendo Jalisco.
Cartel di Jalisco por ta esun mas poderoso y violento di Mexico. A crea su reputacion cu atakenan descarado contra forsanan di seguridad Mexicano, incluyendo un intento di asesinato na 2020 contra hefe di polis di Ciudad de Mexico, cu a lag’e herido y a mata tres otro persona.
Negoshi principal di e cartel ta traficacion di droga na Merca, specialmente metamphetamina y fentanyl.
