Segun Minister Arends, den 2023 lo inverti den un Animal Control Department

Siman pasa Minister di Transporte, Integridad, Naturalesa y Asuntonan di Adulto Mayor, Ursell Arends, a anuncia e campaña di microchipping pa mascotanan pa yuda combati e problema di cacho y pushi ariba caya. E tema aki ta uno cu pa hopi aña a wordo discuti, specialmente e falta di espacio pa e cachonan cu wordo removi di caya.

Durante e conferncia di prensa Minister Arends a señala cu e ta na altura di e problema cu e cantidad grandi di cachonan riba caya ta causa den hopi bario na Aruba. Pero ademas di e problema aki, y aunke por rescata e cachonan for di caya, e espacio cu tin pa e bestianan aki ta hopi limita.

Centro di Control di Cacho (CCC) ta caminda cu cacho- y pushinan ta wordo hiba ora cu nan wordo rescata for di caya y no tin doño. Na CCC tin espacio pa un total di ocho cacho, segun Minister ta informa, tin espacio pa puppies tambe y tin espacio hopi limita pa pushi. “Den mi paraceer e no ta e forma mas humano tampoco pa atende pa loke ta trata e pushinan”, el a agrega.

Mirando e situacion grave di esapcio pa e bestianan aki el a menciona cu den presupuesto 2023 tin fondonan aloca pa asina Gobierno di Aruba por inverti den un Animal Control Department.

“Esey ta e pasonan cu nos ta bay tuma tambe pa mehora unda e cachonan aki ta wordo ubica na momento cu nan wordo gara y removi for di riba caya. Mi sa cu e problema ta den hopi bario, e ta un problema pa añas caba y nos ta cuminsa atende cu esaki di un forma agresivo aworaki”, Minister Arends a remarca.

Cu e campaña di microchipping, el a splica, cu nan ta spera cu e por yuda minimalisa e cantidad di cachonan riba caya usando informacion cu lo yuda localisa e doñonan di e cachonan cu ta riba caya cu si tin doño. “Mi ta spera cu comunidad por compronde e stapnan aki cu ta wordo tuma y en bes di duna resistencia colabora y mantene nan cacho den cura.”

El a resalta cu aworaki unabes cu e cachonan wordo microchip, nan por wordo hiba back na nan doño mas facil. El a comenta cu hopi biaha cachonan cu ta wordo encontra den e bario mes nan ta na altura cu e cacho tin doño, pero ta dificil pa localisa e doño. Cu microchip lo bira mas facil pa hiba e cacho back na e famia cu e ta pertenece.