Parlamento den su mayoria gubernamental e siman aki a aproba e plan fiscal pa 2023 di gobierno, creando un hecho cu den curso di otro aña lo proba razon di un di e dos bandanan politico. Por bisa awor caba cu esey ta bay depende di con e medidanan anuncia ta bay tuma efecto localmente, den e contexto di e situacion internacional manera cu e ta actualmente.

Gobierno di su banda a trece dilanti e parti positivo di ‘duna back’ na e ciudadano y e empresario, pa compensa efectonan negativo, parcialmente. Esey ta e caso cu e aumento di entrada efectivo a traves di baha impuesto riba salario y entrada, aumento di e parti sin impuesto di entrada, extra ingreso den forma di Reparatietoeslag pa pensionado, etc. Esey ta berdad, pero e otro banda di e medaya ta cu e medidanan a ser tuma primordialmente pa crea mas entrada pa gobierno. Anto, na final di dia e suma cu lo mester drenta caha di gobierno durante aña, mas di 100 miyon florin, lo ta sustancialmente mas cu loke gobierno ta ‘duna back’; y esey ta bin di e cartera di e ciudadano y/o empresario.

Y aki nos ta bin topa cu algo mas: pa mas cu ta argumenta cu e BBO den su forma actual no ta un impuesto pa e consumidor, sino pa e empresario,y por lo tanto por discuti si berdaderamente e BBO ta un impuesto indirecto, ta keda e hecho cu en principio TUR gasto di empresa por termina den e prijs cu un empresario ta pidi pa su producto/servicio. Si e dicidi di no inclui cierto gasto den su prijs, esey ta un decision cu e mes ta tuma y lo mester biba cu e consecuencia, di menos gnashi. Pero, den mayoria di caso nos lo mira cu tur e medidanan gubernamental ta termina den prijs mas halto pa e consumidor, loke tambe ta e caso cu e aumento di BBO cu 1%. Ademas, e decision cu lo bin cu cobranza di BBO na entrada ta crea un complicacion di e sistema cumulativo cu BBO ta caba. Henter e decision di aleha for di e BBO ta hustamente cu, segun cu e tasa di BBO/BAZV/BAVP ta subi, e efecto cumulativo ta bira iresponsable, motibo pa strategicamente move pa un sistema manera BTW.

Pero kico nos ta mirando actualmente? Cu gobierno a posterga introduccion di BTW y no ta duna fecha pa su entrada na vigor… Esey tin, segun nos, un motibo politico tactico su tras: gobierno ta bay sinta warda te sigur mitar di 2023 pa observa con e plan actual ta bayendo y…, e ora ta laat atrobe pa start up e mecanismo legislativo pa introduccion di BTW entrante 2024. Y si no ta introduci e BTW na 2024, sigur den aña di campaña na 2025 e no ta bay tuma lugar mas… Kico esey lo significa? Cu nos ta keda stanca cu un sistema cumulativo, cu mas ainda ta stimula inflacion, fuera di e inflacion importa cu tambe ta sigui presente, sin cu ta trata di un asunto temporal, unda gobierno ta mustra claramente cu ta trata di un fase transitorio; pasobra esey, nos no por a lesa ni scucha ningun caminda o momento.

Awor, e pregunta ta pakico gobierno ta kere cu e modelo aki, di cual no solamente oposicion, sino tambe nos Conseho Consultivo ta bisa cu e conoce bastante riesgo y deficiencia, ta bay funciona pa haci gobierno exitoso? Pasobra si bo no ta kere aden, anto lo bo no ta hacie, toch? E contesta ta cu gobierno ta kere cu e recuperacion y subsiguiente crecimento continua di economia ta duna un margen di operacion cu ta suficiente pa supera e desbentahanan, y pa mas cu compensa pa loke gobierno a ‘duna back’ na diferente grupo di entrada abao. Esey naturalmente ta un opinion y lo mester mira ainda si esey ta bira realidad. Pero, tin algo mas aki, y esey ta cu gobierno ta aumentando e parti di GDP cu e ta tuma como su ‘fair share’. Cu eliminacion di varios areglo faborable pa empresa priva, manera den materia di propiedad inmueble, esaki ta trece mas placa aden pa gobierno, aunke mester bisa cu a baha e impuesto riba ganashi te na 22% tambe. Esey ta un escogencia politico cu ta haci y lo sigui defende esaki tambe. Sin embargo, ta bira un poco dificil pa na mes momento bisa cu ta mehora e clima di inversion, pasobra esey no ta parce nos cu ta bay ta e resultado cu tur e medidanan tuma. Ehemplo: a aboli e regimen di IPC, pero no a haci nada cu e impuesto riba dividendo, cu a keda awor como un peso mas grandi, despues cu un compania a paga su winstbelasting, pa tur compania.

Finalmente, mester bisa cu tur loke a presenta awor, no ta duna un vista cla kico ta e reforma fiscal final. Gobierno ta parce un hungador di poker, cu e cartanan bon pega na pecho. Tin hopi cos cu por mehora, por ehemplo e dramatico situacion di impuesto di importacion cu ta grita pa un simplificacion. Di e banda ey nos no ta observa solamente un silencio grandi. Parce cu e sistema di impuesto a bira obheto di ‘pedicure’ o ‘manicure’ sin cu tin claridad unda e cos aki ta bay. En todo caso, e consumidor ta bay paga tur cos, pasobra empresanan no ta bay carga e peso.

LJMADURO – 16-DEC-2022