Siman pasa diahuebs, Team Dreyer Aruba a sali rumbo pa Colombia pa representa Aruba den torneo Future Soccer Cup (FSC). Ayera tardi Team Dreyer a regresa Aruba y coach Jimena Borja a conta con e torneo aki a bay pa e ekipo di Aruba.

Borja, ken ta e coah di ekipo U11 di Team Dreyer, a splica cu e ekipo di Aruba a hunga un total di cuater wega oficial. Di e cuater wega aki nan a gana dos y a perde dos, un resultado cu ta hopi bon pa e ekipo cu ta prome biaha cu ta biaha y hunga internacional.

“Nos ta kere e ta un extremadamente bon resultado pa nos. Di mes cosnan por bay miho, pero pa ta e prome biaha cu nos ta bay afo cu e team cu a conoce y a train duro den ultimo lunanan, el a bay hopi great”, Borja a indica.

El conta cu den e ultimo wega Team Dreyer a bay contra Deportivo Pereira. Esey tabata un encuentro deportivo contra U11 di Pereria, cu ta e campeon actual di e maximo division di Colombia. Team Dreyer a empata 1-1 den e wega y den penalty nan a logra gana 5-4. “Esey tabata un tremendo experiencia pa nan sobretodo pasobra nan a hunga U11 contra U11 pa prome biaha, hopi bon training”, el a enfatisa.

Borja a agrega cu di loke nan por a wak e nivel di Colombia ta hopi halto, pero e ta hopi contento cu a tremendo papel cu e muchanan a haci cu e enfrentamento cu nan a haya.

El a menciona tambe cu e siman cu nan a pasa na Colombia tabata un experiencia hopi bunita tanto pa e hungadonan como pa e mayornan pasobra nan por a siña conoce otro pafo di futbol.

Pa loke ta trata e diferencianan di wega y kico Aruba por mehora den dje, Borja a splica cu na Colombia e muchanan ta train pa bira profesional, esey ta e prome cosnan cu nan a ripara. El a conta cu el a papia cu diferente coachnan y nan ta train cu e mentalidad pa e muchanan yega na nivel profesional.

“Bo por wak cu nan ta compronde futbol di un otro manera completamente. Mi a papia cu e diferente coachnan y nan ta train e muchanan no pa pret, no pa hobby, no pa mantene e muchanan ocupa y no na cas, pero si no pa bira profesional y wak futbol manera un profesion. Por ta ‘kinan na Aruba nos mester switch un tiki e mentalidad y cuminsa prepara e muchanan pa esey”, el a remarca.

Por ultimo Borja a conta cu ya caba nan ta pensando ariba e siguiente experiencia y awo e trabou di berdad ta bay cuminsa pa e siguiente campeonato. Nan ta trahando riba e siguiente encuentro pero nan ta sigur nan lo tin dos participacion internacional den 2023 un na Sur America y un na Norte America.