Si a drecha Arubahuis… Cuanto Arubahuis tin aki…?

Den varios sentido e presentacion di e investigacion na Arubahuis tabata algo excepcional. Esey sigur tambe den sentido positivo. Por ehemplo, poco biaha nos a mira asina hopi detaye di un caso di mal maneho presenta, sin mencion si di nomber di persona, cu excepcion di e figura principal, loke en todo caso a mustra un bon parti di e paisahe interno di desorden, falta di maneho y instruccion, y un administracion financiero careciente di lo mas basico di loke por supone como minimo den cualkier departamento.

E detayenan treci dilanti a duna di comprende pakico e asunto finalmente a termina den man di Ministerio Publico, aunke a keda e duda durante e reunion cu e file a bay caba, o lo bay proximamente. Sin cu a bisa esey cu tanto palabra, por a comprende cu ta trata di posible maneho delictivo di e anterior ministro plenipotenciario, como e persona clave na nivel maximo investiga y entrevista den e proceso. Cu esey, e caso ta den man di husticia y lo mester warda te dia haya resultado di e (pre-)investigacion penal, si e asunto ta haya un continuacion den corte o ta termina den sepot di e caso.

Pa bolbe na e proceso supuestamente conclui cu e presentacion, ta importante señala cu e caso aki no ta uno di proporcion gigantesco, y ta pesey ta keda un interogante pakico e caso mester a dura asina hopi. Honestamente, nos no ta impresiona cu e hustificacion cu Promer Ministro a duna. Si, segun su propio declaracion, el a haya promer indicacion serio di e caso na september 2021, y el a envolve CAD inmediatamente, no por culpa e servicio aki di lentitud, pasobra nan investigacion tabata cla na januari 2022 caba, pues despus di cuatro luna. Despues a dura casi un aña pa parlamento haya informacion di esaki. E hustificacion cu a duna tabata cu e ‘afhandeling ambtelijk’ di tur esnan envolvi lo no a permiti bin Staten mas tempran cu e asunto aki. Nos ta cortesmente full di desacuerdo cu esaki, y pakico? Pasobra awor a bin parlamento cu un bon presentacion, cu ningun mencion indebido di ningun persona, es decir, si a trece esaki na februari na parlamento esey lo no a stroba ningun proceso interno di ‘afhandeling’ di asunto disciplinario y di otro indole, pasobra parlamento no a haya sa ningun nomber di ningun persona envolvi, mucho menos ki papel nan tabatin y ki consecuencia disciplinario esaki lo por (taba)tin pa nan. Y asina mester ta tambe, pero hustamente esey no ta hustifica warda casi un aña, cada vez scondiendo tras di e excusa cu e caso “no ta cla ainda”. Aki, cu tur respet, nos Promer Ministro segun nos a tuma un decision politico pa tranca e proceso, pasobra pa algun motibo e no kier a saca e asunto mas tempran. Esey naturalmente ta keda un asunto di opinion.

Pero ademas e asunto aki ta un precedente peligroso. Esey ta cu, si ‘ambtelijke afwikkeling’ di un caso relativamente simple manera esaki, ta tuma aña y mey y ta inevitable, esey ta bisa hopi di e ineptitud di e departamento cu mester handle e asunto. Nos no ta referi aki na CAD, cu tin tur nos respet, mirando e escasez di cuadro profesional, cu gobierno conoce y ta confirma, pero cu no tin ningun solucion na horizonte. E problema aparentemente no ta e placa, sino e falta di voluntad politico, di ‘berde’ y ‘geel’, pa resolve esaki, pa manera nan ta bisa na Hulandes: “welbegrepen eigenbelang” contra supervision financiero adecua.

E enfoque di nos preocupacion ta e departamento di Recurso Humano cu no ta parce apto ni capaz pa analiza y crea un plan di formacion profesional pa Arubahuis na tempo. Nos ta bisa esaki pasobra e presentacion superficial di e asunto, no a duna nos ningun garantia o confianza cu a drecha algo caba. Es mas, nos ta haya e impresion cu e mesun situacion por surgi atrobe na e propio Arubahuis, pasobra tur cos a keda pa drecha den futuro, na man di ken? Peor ainda ta ora nos haci nos mes e pregunta cu e propio parlamentarionan a resulta incapaz di puntra, na e ministro y na CAD/DRH: con probable o improbable e mesun situacion aki ta na cualkier otro departamento? Cuanto departamento tin caba regla estricto di administracion, sigur financiero, y su cumplimento, pa nos por stop di preocupa cu loke e pasa na Arubahuis por sucede mañan na cualkier otro? Lo ta bon si nan a puntra CAD, mirando e practica aki, con leu nos ta ainda di haya un declaracion aprobatorio di accountant pa Pais Aruba, si Arubahuis ta refleho di e realidad den gobernacion? Asina e reunion di Staten a cera cu algun pregunta apenas relevante, mientras nos promer mandatario no tabata laga ningun ocasion bay perdi pa mustra cu su maneho ta mucho mas transparente cu di e gobierno anterior. Aunke na cierto momento iritante pa su repiticion, esey parcialmente ta berdad, pero ta laga e preguntanan clave, general, riba mesa: Si cada caso mediano o chikito di posible fraude o mal maneho, ta tarda un aña y mey, ta con mester bay drecha Aruba mes, cu decenas di departamento unda e maneho financiero no lo ta mucho mihor cu esun di Arubahuis.

E problema no ta e reglanan general cu ta acorda y implementa hunto cu Hulanda. E problema ta e implementacion den tur e departamentonan ey, cu tin decadas di desatencion wardando riba mehoracion.