(AP) — Ehercito Mericano formalmente a lansa un unidad di forsa espacial na Sur Korea ayera, su prome facilidad asina den teritorio stranhero cu lo permiti Washington monitor na un miho manera su rivalnan Nort Korea, China y Rusia.
E activacion di e US Space Forces Korea na base aereo Osan cerca di Seoul a yega despues cu Nort Korea a lansa un cantidad di misil balistico cu capacidad nuclear diseña pa dal continente Mericano y su aliadonan Sur Korea y Hapon den lunanan recien.
E unidad ta pertenece na e forsa espacial Mericano, cual a keda estableci na december 2019 bao presidente Donald Trump como e prome servicio militar nobo na Merca den mas cu 70 aña.
E forsa espacial ta ser mira sobriamente como un afirmacion di e necesidad pa organisa mas efectivamente pa defensa di interesnan Mericano den espacio – specialmente satelite usa pa nabegacion civil y militar, inteligencia y comunicacion. Un rapport anterior for di Pentagon a bisa cu China y Rusia a asumi esfuersonan mayor pa desaroya tecnologia cu por permiti nan pa destrui of interumpi satelitenan Mericano of di aliadonan den un crisis of conflicto.
E US Space Forces Korea ta subordina na un unidad mas grandi di US Space Force estableci dentro di comando Indo-Pacifico luna pasa.
