(EFE) – Por lo menos diestres auto, entre nan cinco bus, a wordo kima di manera total of parcial pa personanan radical identifica como bolsonarista;, tambe un persona a resulta herida den e manifestacion cu a tuma luga dialuna ultimo den oranan di anochi na Brasilia, segun balans preliminar di Cuerpo di Bombero.
Un grupo di siguidonan di e presidente ultraderechista Jair Bolsonaro, a cende na candela ocho auto di turista y cinco bus den e region central di e capital di e pais, e cual ayera a manece cu siguridad reforsa y poco transito den algun zona.
Tambe nan a destrui e fachada di algun edificio, nan a benta abou borchinan di trafico y a kima barinan di sushi na un zona hotelero unda e presidente eligi Luiz Inacio Lula da Silva ta hospeda y e cual oranan prome a ricibi un diploma pa su victoria den eleccionnan di october ultimo.
Un persona di 67 aña di edad a solicita atencion medico pa via cu a wordo afecta cu gas lagrimogeno cu forsa di siguridad a usa pa purba di controla e situacion, segun Cuerpo di Bombero a señala na medionan local. E protesta a cuminsa cerca di un warda di polis y como contesta a detene un lider indigena di ideologia bolsonarista, cu ta acusa di instiga e protestanan.
Jose Acacio Serere Xavante a wordo deteni pa orden di Corte Supremo cu e sospecha di organisa “manifestacionnan antidemocratico na varios luga di Brasilia”. Lula lo tuma posesion como presidente dia 1 di januari di 2023 e cual no a duna comentario di e manifestacionnan den un prome mensahe publica ayera diamars riba su cuenta oficial di Twitter y a enfoca riba e proceso di transicion.
E protestanan a wordo condena pa varios autoridad, entre nan presidente di Congreso Nacional, senador Rodrigo Pacheco ken a bisa cu “e actonan indignante aki di vandalismo na Brazil, cu a wordo haci pa un minoria cu rabia. Ta sirbi pa bira pio e escenario di intolerancia cu tabatin den e campaña electoral”, el a bisa.
