Tin ‘deficit democratico’…? Si, na Aruba mes…

Pa di tantisimo biaha nos ta haya nos confronta cu e cancion raya di ‘deficit democratico’ den Reino Hulandes. E biaha aki el a bira tema actual pa via di un politico Hulandes mes, nos actual secretario di estado pa asunto di Reino, cu aparentemente no por pone e asuntonan alrededor di COHO marcha bon y awor a haya ta bon pa cuminza duna oido na e debate aki, cu desde 2010 no a carga ningun fruto.

Riba su mes, si nos no papia di ‘deficit democratico’ pero di con por haci cu nos como comunidad ta sinti nos mas involucra como ciudadano Hulandes y ciudadano di Union Europeo, esey lo ta un discusion mas valido. Contrario na loke nos politiconan ta trece dilanti como tema pa nan pleitonan cu Den Haag, cu den hopi caso no ta nos interes como ciudadano, lo ta bon pa pensa un rato kico lo por mehora pa nos ta sinti nos mas representa. Mester conclui di biaha cu nos tin caba e posibilidad di vota pa Parlamento Europeo. Poco ta haci uso di e posibilidad ey, pa un motibo masha simple: cu Hulanda (Den Haag) pa hopi di nos ciudadanonan ta un ‘ver van mijn bedshow’ anto Bruselas o Strasburgo ta mas leu ainda. Nos por considera derecho di voto den parlamento Hulandes? Numericamente esey ainda lo no cambia mucho, y mester tuma na cuenta cu ta pa e partidonan Hulandes nos lo vota, cu lo dedica atencion minimo na nos asuntonan. Loke realmente ta toca nos, ta con ta goberna e pida baranca aki… Por ta cu nos por limita nos na cierto representacion ora ta trata tema di interes pa nos, manera ley di Reino y tratamento di tratado internacional. Pero esey no mester ta a base di staciona mas politico di Aruba na Den Haag, pasobra esey lo no ta mas cu crea puesto pa faborecido di e partido na mando. Loke si por haci ta percura pa e representacion (Arubahuis) haya un equipo mas profesional pa atende asunto cu e mundo politico na Den Haag, pero esey tambe ta bay termina den e tradicional fiesta di puesto. Y si manera ta e caso actualmente, un simple investigacion di posible mal maneho di Arubahuis ta tuma mas cu un aña, y mientras tanto e figura principal den e tragicomedia ey a desaparece di mapa, nos ta kere cu pa di tantisimo vez nos ta duna prueba cu lo tin cos di drecha na Aruba mes, promer cu nos ta bay hiba bataya otro caminda.

Pa bisa e cos di manera simple: si ta denuncia Hulanda pa ‘deficit democratico’ den trato di nos politiconan, con situacion di democracia na Aruba mes ta? Ban cuminza cu nos parlamento; nos a mira algun cambio positivo den ultimo aña, cu un composicion parlamentario nobo? Kico a cambia den e practica di reunion? Mesun ambiente di bochincha, presidente di Staten cu kier duna les na su coleganan den ventila opinion, pero ta keda sin actua riba peticion di oposicion pa reunion, asumiendo e rol di ‘protector di gobierno’… Unda si nos por mira un cambio positivo ta cu e documentonan mas recien pa keda trata ta aparece riba e website di parlamento, pero e documentacion completo manera e tabata riba e mesun website te aña 2016, aparentemente a bay perdi, cu resultado cu nos ta mas mal para cu tanto aña pasa. Nos sa cu no ta gana popularidad cu e tema aki, pero ta esaki ta e trabao duro cu mester haci pa tene comunidad informa: deficit democratico cu nos…

Pero esey no ta tur. Un di e problemanan mas importante ta e nivel intelectual desplega den parlamento, cu a pesar di algun excepcion faborable, no ta loke nos mester. Mayoria di e miembronan tin un conocimento demasiado superficial den hopi asunto, y aparentemente e adicion di ‘fractiemedewerker’ no a yuda tampoco pa eleva loke ta trece na mesa na contenido. Riba su mes e ‘deficit’ aki ta logico, pasobra den un pais chikito cu parlamento chikito bo no por cubri tur tema di manera satisfactorio, y pior ainda den caso di e fraccionnan chikito. Pero si banda di esey ta dedica mas tempo pa haya sa ken den famia di e contrincante por a haci algo (malo) cu por usa durante reunion, ta recomendable pa pueblo cuminza busca mihor representacion. Ademas, y esaki ta mas tristo ainda, cu ora e ministronan, no tur, drenta sala, nan ta participa plenamente den e bochincha idiota aki, cu nos como ciudadano mester ‘admira’ y paga… Si ta asina nos mester sigui, no ta mihor pa nos baha parlamento te na 11 asiento y conseho di ministro na 3 o 4?

Awor, pa bolbe un rato na e motibo pakico nos politiconan ta grita cada tanto tempo cu Hulanda ta practica un ‘deficit democratico’. Esey ta sucede ora tin problema causa pa nos politiconan, manera debe publico cu no por crece mas, anto e ora e ‘partner’ den Reino ta bira colonialista, usurpador, malhechor y mas di e calificacionnan cu no mester tin lugar aki. Si e politiconan Hulandes por limita nan mes na bishita nos, ora na Hulanda ta friu…, y tur cos ta anda bon aki, nan ta disfruta di e clima y cla. Ta mal gobernacion, desde 1986 te awe, ta haci cu nan ta mete cu nos. Y ban ta franco: e actual debate di ‘deficit’ no ta pasobra Aruba tin e leynan di COHO y di supervision financiero tranca?