Grupo di Adultonan Mayor a ricibi charla tocante Plan di Impuesto 2023

Un grupo di adulto mayor ayera a haya un charla di parti di Departamento di Impuesto na Organisacion di Pensionado Publico Arubano (OPPA), tocante cambio di impuesto cu enfoke riba relevancia pa adulto mayor.

Cu iniciativa di Ministerio di Asuntonan di Adulto Mayor den marco di cambionan den impuesto cu lo bin pa aña 2023, Sra. Louenne Gomez-Pieters, director di departamento di Impuesto a splica cu obhetivo principal di plan di impuesto 2023 ta e recuperacion di Aruba su finanzas publico por medio di compensacion, reparticion husto y mehoracion di cumplimento di tur ciudadano y bishitante.

E tarifa actual ta di BBO ta di 1.5%, mas BAVP 1.5% y BAZV di 3.0% cu den total ta 6%, ta bay tin un tarifa nobo di BBO unda lo aumenta na 2.5%, mas BAVP 1.5% mas BAZV di 3.0% loke ta duna un total di 7%.

Cu cada aumento di tasanan di impuesto, inflacion tambe ta tuma luga, manera Gomez-Pieters a sigura e inflacion cu ta wordo calcula pa Central Bureau Statistiek ta di 1.4% pa aumento di e BBO.

Pero cambionan di impuesto no solamente ta afecta prijsnan na Aruba door cu Aruba ta importa mayoria di productonan cu ta den un supermercado, ademas tin un situacion mundial unda cu prijsnan ta halto caba pa via di scarsedad di material y productonan.

“Den esey nos no por influencia, pero den loke si nos por influencia ta e cambionan cu nos mes ta propone pa por evita cu e forsa di poder di compra ta bay mucho atras compara cu prome cu e pandemia”, Gomez-Pieters a bisa.

Gobierno a introduci un pakete di compensacion pa mitiga e efectonan aki di inflacion, menos e inflacion cu ta bin di afo, e plan di impuesto ta trece cune areglo pa comerciantenan chikito (kleineondernemersregeling) ta reduci e limita di entrada na 50.000 florin pa aña y ta absolve e comerciante chikito di e obligacion di entrega declaracion y paga BBO, BAVP y BAZV.

E simplificacion di e ley aki ta reduci e carga administrativo cerca comerciantenan chikito unda cu nan lo tin e obligacion di declara y paga BBO, BAVP y BAZV na momento cu e surpasa e limite di entrada di 50.000 florin pa aña.

“Esey ta un alivio pasobra nos no kier pa contribuyentenan chikito tin tanto gastonan di administracion y tambe pa bay entrega nan formulario cerca nos sin tin mester”, el a bisa.

Ta bay cobra BBO, BAVP y BAZV riba servicionan di telecomunicacion, transmision di radio/television y servicionan electronico si e cliente (afnemer) ta un residente di Aruba.

Den e ley di BBO actual e servicionan menciona ta carga BBO, BAVP y BAZV solamente si e proveedor di servicio ta un residente fiscal di Aruba of ta brinda su servicionan pa medio di un establecimento permanente (vaste inrichting) na Aruba.

E cambio di ley ta conta tambe pa servicionan di publicidad y mercadeo, servicionan di consumo, abogacia, specialistanan di impuesto (fiscalisten) servicionan di contabilidad y otro servicionan similar.

E empresario no residente por asigna un representante permanente (fiscaal vertegenwoordiger) na Aruba cu ta para responsabel pa garantisa e cumplimento cu obligacion di entrega formularionan di BBO, BAVP y BAZV y haci e pagonan corespondiente den nomber di empresario.

A base di un decreto ministerial (ministeriele regeling) lo por determina cu dicho nombramento mester ta obligatorio den cierto circunstancianan.

E prome cambio pa por duna un alivio na e subida di BBO ta un aumento den e suma liber di impuesto pa tur contribuyente individual y empresanan chikito di 28.861 florin ta bay pa 30.000 florin pa aña pa tur contribuyente.

E di dos cambio cu lo tin cu ta wordo proponi ta baha e tarifa di e prome dos categoria di impuesto riba entrada cu ta di 2%, na e momentonan aki e prome ta di 12% y e di dos ta na 23%, por mira cu efecto e tin total riba e contribuyentenan cu ta pagando longbelasting cu imkomstenbelasting, e cantidad di contribuyente cu tin un entrada menos cu e suma liber di impuesto di 30.000 florin pa aña ta 36.161.

E suma aki no ta bay paga e suma di longbelasting cu inkomstenbelasting mas pa motibo cu e suma liber di impuesto ta wordo subi di 28.861 pa 30.000 florin.

E siguiente categoria cu lo mira un alivio ta den e prome categoria di entrada di impuesto cu ta baha di 12% pa 10% caminda cu den e categoria tin 17.162 contribuyente.

“Por ta e ta zona un cambio chikito, pero un cambio asina aki e ta costa pa caha di gobierno 20 miyon florin, si nos wak cu aumento di BBO ta genera 70 miyon florin extra cu BBO di 1% extra, ainda gobierno mester keda cu un surplus pasobra esey ta palabracionnan cu tin cu Hulanda y bo ta wak cu espacio pa duna compensacion no ta mucho grandi”, Gomez-Pieters a señala.

E di dos categoria tin 4.516 contribuyente ta bay conoce un alivio di 2% di nan longbelasting cu imkomstenbelasting, e categoria 3 y 4 cu ta esnan cu ta gana riba 135.527 florin pa aña no ta conoce ni un cambio y ta un grupo mas chikito di 668 persona.

Compensacion pa contribuyentenan individual cu a wordo proponi, ta separa cobransa di impuesto riba entrada di pensioen di behes di SVb, tambe ta aumenta e suma di ‘reparatietoeslag’ pa tur pensionado di SVb di 125 florin pa 170 florin pa luna y lo no cobra impuesto riba tips.

Pa negoshinan ta bay baha tarifa general di Winstbelasting for di 1 di januari 2021 di 25% pa 22%, ta subi porcentahe di deduccion di inversion (inverteirngsaftrek) di 6% pa 10%, ta introduci restriccion di deduccion di entre otro pago di interes pa uso di bienes y servicio na entidadnan y personanan afilia, ta elimina e posibilidad di forma un pensioen den propio maneho (pensioen in eigen beheer) entrante 1 di januari 2023 cu un periodo transitorio te cu 31 di december 2023 durante cual ta mantene un tarifa reduci di 15% riba compra di pensioen.

Esaki y otro medidanan cu ta wordo proponi y ta disponibel riba e Facebook page di Minister Ursell Arends pa personanan por haya sa mas informacion tocante e tema aki cu ta hopi extenso.