(AP) — Reino Uni a anuncia plan diabierna pa reduci reglanan bancario introduci despues di e crisis financiero di 2008, den un intento pa atrae inversion y sigura e status di London como centro financiero lider na Europa.
Hefe di teosoro, Jeremy Hunt a bisa cu e cambionan, cu ta bin despues di e salida di Reino Uni for di Union Europeo na 2020, ta bay haci Reino Uni “un di e hub di servicio financiero mas habri, dinamico y competitivo na mundo.
E pakete di mas di 30 cambio ta inclui elimina un limite riba bonus pa bankeronan y reduci rekisitonan di capital pa prestamistanan chikito. Gobierno tambe a bisa cu ta bay revisa regulacionnan cu ta tene bankeronan responsable pa nan decisionnan y ta bay relaha reglanan di “ringfencing” destina pa separa banca di inversion di riesgo for di operacionnan di retail.
Hunt a bisa cu gobierno ta usando “libertadnan di Brexit” pa haci Reino Uni mas competitivo. Pero hopi economista a destaca cu e salida di Reino Uni for di UE a crea barera pa comercio y a hiba algun compania pa muda nan oficinanan y trabao na otro ciudadnan Europeo.
Aña pasa, Amsterdam a surpasa London como e hub di intercambio di accion mas grandi na Europa, maske London ta keda e centro di servicio financiero mas grandi en general.
