Den e Asamblea General di Nacionnan Uni 31 october 2003 a adopta mediante resolucion 58/4 e United Nations Convention against Corruption (UNCAC), esta Tratado di Nacionnan Uni contra Corupcion, cual tratado a drenta na vigor 14 december 2005, y tin actualmente tur miembro di Nacionnan Uni menos Siria, Eritrea y Noord Korea como pais partido.

Asamblea General di Nacionnan Uni a designa 9 december como International Anti Corruption Day pa crea conscientisacion riba e problema di corupcion y con e UN Convention against Corruption por yuda pa combati y preveni corupcion.

E organismo di Nacionnan Uni encarga cu e Secretariado pa UNCAC ta e United Nations Office on Drugs and Crime (UNODC) cu sede na Vienna, Austria.

E organismo aki hunto cu FATF-GAFI tambe ta traha riba e temanan di labamento di placa y financiamento di terorismo.

Un di e temanan principal di UNODC y su campaña global pa combati corupcion ta pa sigura integridad financiero pa paisnan miembro por logra cumpli cu e Obhetivonan di Desaroyo Sostenibel (Sustainable Development Goals, SDGs).

Tema pa 2022: Binti Aña di UNCAC: Un Mundo Uni Contra Corupcion

E aña aki e tema ta “UNCAC at 20: Uniting the World Against Corruption”, esta “Binti aña di UNCAC: Un Mundo Uni contra Corupcion”, en bista di e hecho cu na 2023 lo conmemora cu 20 aña pasa a adopta e principal y UNICO tratado di Nacionnan Uni pa combati corupcion.

Mensahe di Director Ehecutivo di UNODC, Sra. Ghada Waly na ocasion di Dia Internacional Contra Corupcion

Corupcion ta pone na peliger nos siguridad, e ta impulsa crimen organisa, ta destrui nos economia, ta destrosa oportunidad pa desaroyo y ta atrapa hende den ciclo di desigualdad y pobreza sin salida.

Riba e Dia Internacional Contra Corupcion y tur dia, nos tur por actua pa pone un fin na corupcion, y nos MESTER haci esaki, pasobra nos comunidadnan ta perdiendo triyones di dollar y cu esaki innumerabel oportunidad pa desaroyo y progreso.

Mientras cu cada dia mas nos ta enfrenta incertidumbre financiero, y cu escalacion di conflictonan y impactonan di cambio climatico internacional aumentando, ta bira mas cu nunca awor importante pa caba cu corupcion.

UNODC ta actuando. Nos a logra establece nos promer centronan regional na Africa y Latino America pa brinda asistencia y experticio mas cerca di e sitio na unda esaki ta ser pidi.

Nos a amplia e cooperacion pasando frontera a traves di e Red GlobE (GlobE Network) cu 127 organisacion den 69 pais y nos a crea un alianza cu World Bank (Banco Mundial) pa aumenta nos esfuersonan pa recupera activos den henter mundo (Stolen Assets Recovery – StAR).

Den tempo di emergencia, ta fundamental pa por conta cu garantia y instrumento disponibel pa lucha contra corupcion. E esfuersonan pa maneha y recupera di e pandemia di COVID-19 a demostra cu alocacion di sumanan cuantioso pa haci e maneho y recuperacion posibel ta bin acompaña pa riesgonan grandi financiero.

esfuersonan anti corupcion lo ta esencial pa salvaguardia financiamento di accion pa atende cu cambio climatico y sigura cu e transicion pa energia renovable y reduccion di emisionnan di gasnan cu efecto invernadero no ser perhudica pa practicanan di corupcion.

Hubentud y mucha ta esnan cu mas chance pa perde pa loke ta nan futuro bienestar. Promove programa educacional contra corupcion ta fundamental pa conecta, involucra y empodera e proximo generacionnan. Esaki ta inclui proteha deporte contra corupcion.

Como guardian di e Tratado di Nacionnan Uni contra Corupcion, nos ta apoya mas di 185 pais pa nan por coopera cu otro y actua pa combati corupcion.

E aña venidero e Tratado ta celebra su di binti aniversario.

E ta un oportunidad pa duplica e esfuersonan global pa confronta corupcion y garantisa integridad den tur sector di comunidad y den henter mundo.

E lucha contra corupcion na nivel local

Aruba como parti di Reino Hulandes a ratifica e Tratado UNCAC.

Sinembargo Aruba den su lucha contra corupcion a keda atras, ya cu ainda no tin un Ombudsman, ta falta pa introduci un Corporate Governance Code pa companianan estatal, tin corupcion den tur loke ta destaho publico y entidadnan cu ta maneha infrastructura y keto bay integridad financiero den gobernacion ta un preocupacion grandi.

A haci un National Integrity Scan segun metodologia di Transparency International y tin un Bureau Integriteit Aruba, pero den practica corupcion no a mengua pasobra e base legislativo pa combati corupcion ta zwak pasobra ni Landsverordening Openbaarheid van Bestuur, Landsverordening Administratieve Rechtspraak tin forza y pa falta di un Ley Ambiental corupcion na escala grandi ta tuma lugar cu tereno pa desaroyo comercial y den e proceso destruyendo biodiversidad, oportunidad pa diversificacion economico y cu impacto negativo pa e turismo na Aruba.

Derroche di placa den destaho no transparente y manipulacion den funcionamento di entidadnan encarga cu infrastructura vital ta causa daño (contrato Eagle LNG, falta di hedging, planta RWZI y Parkietenbos).

Rainbow Warriors Core Foundation hunto cu cuater NGO na Hulanda den Reino Hulandes ta forma parti di Transparency, Accountability and Participation (TAP) Network, cu ta un coalicion internacional di NGO den sociedad civil pa traha riba SDG 16 y pa logra e agenda pa 2030 di SDGs.

Rainbow Warriors Core Foundation ta alabes miembro di Together 2030, un iniciativa global dirigi riba accion pa genera y comparti conocemento riba e implementacion y monitoreo di e agenda pa 2030 y e Obhetivonan pa Desaroyo Sostenibel.

Den e esfuersonan aki promove integridad financiero, combati corupcion pa por logra e SDGs ta un tema di enfoke principal pa atende cu desaroyo sostenibel, derecho humano, cambio climatico, conservacion di biodiversidad y bienestar di ser humano en general.