(EFE) – Gobierno Colombiano conhuntamente cu Mericano, a anuncia cu pa e prome trimester di proximo aña lo convoca un conferencia Latino Americano pa trata e tema di desafio cu migracion den e region ta plantia y “establece reglanan di e wega”.
“Den e prome trimester di 2023 nos lo celebra un conferencia continental Latino Americano cu lo trata riba migracion pa establece reglanan cu lo obligatorio pa tur”, canciyer Colombiano Alvaro Leyva a bisa den un declaracion conhunto cu secretario di Siguridad Nacional di Merca, Alejandro Mayorkas, cu a bishita e pais Andino ayera diabierna.
A pesar cu Leyva a indica cu lo ta un conferencia Latino Americano, Mayorkas a sigura cu e idea ta pa “tur di nos reuni y sigura cu tur lo participa pa desaroya un solucion pa loke ta denomina un desafio colectivo”.
“Nos tin cu respeta derechonan humano di personanan cu ta busca refugio y na mesun tempo nos tin cu cumpli cu leynan di nos paisnan”, Mayorkas a señala y tambe a agrega cu “nan ta busca proteccion di personanan y na mesun tempo crea un oportunidad pa nan por permanece den e paisnan cu nan ta y nan por construi un bida exitoso y prospero”.
Mayorkas a yega na Colombia for di Ecuador den un bishita na unda tabata busca drenta den cooperacion pa enfrenta migracion iregular a traves di Darien, despues di e firma di Declaracion de los Angeles, over migracion na juni ultimo durante Cumbre di America.
E anuncio aki ta wordo produci ora ta finalisa e aña den cual tur record a wordo kibra pa personanan cu a crusa e peligroso selva di Darien, cu ta separa Colombia y Panama, den nan caminda pa Merca.
