(AP) – Microsoft ta e punto di enfoke recientemente pa un serie di noticianan tocante e compania y su movidanan di negoshi.
Riba diaranson, Microsoft a yega un acuerdo pa haci e videogame popular Call of Duty disponibel riba Nintendo pa 10 aña si e compra di e creador di wega Activision Blizzard tuma luga, cual ta un intento aparente di combati obhecionnan di rival Sony.
E adkisicion aki ta enfrentando critica di reguladornan na Merca, Europa y otro camindanan tambe. Microsoft, creador di e consola di wega Xboxm ta enfrentando resistencia for di Sony, cual ta traha e consola rival PlayStation y a trece dilanti preocupacionnan den e vigilantenan tocante perde acceso na loke nan ta yama un wega “esencial.”
Phil spencer, cabesante di Xbox a publica riba Twitter cu Microsoft a “drenta un acuerdo di 10 aña” pa trece Call of Duty na Nintendo. Microsoft su president Brad Smith a publica su gratitud na Nintendo, cual ta crea e consola Nintendo Switch, bisando cu e mesun oferta ta disponibel pa Sony, “Cualkier dia cu Sony kier sinta y dialoga, nos lo ta contento pa yega na un trato di 10 aña tambe,” el a bisa.
Smith a bisa cu e acuerdo lo trece Call of Duty na mas plataforma pa mas hungadornan, y “esaki ta bon pa competencia y pa clientenan.”
Sony su oficina di prensa Europeo no a responde pa comentario. Agregando na e presion di Sony, Microsoft tambe a bisa diaranson cu nan ta comprometi pa mantene Call of Duty riba e plataforma Steam, un mercado digital pa weganan di computer, yegando na un acuerdo cu e operador di Steam yama Valve.
Na curason di e disputa ta e control di futuro lansamentonan di Activison Blizzard su weganan mas popular, specialmente Call of Duty, un wega cu un tema militar cu ta sumamente popular. Activision a reporta luna pasa cu e instalacion mas moderno di e franquisia a genera un ganashi di 1 biyon den benta riba e dia di lansamento dia 28 di october.
Sinembargo, riba diahuebs Federal Trade Commission a demanda pa blokia e adkisicion di 69 biyon dollar cu Microsoft tin plania, bisando cu esaki por causa daño na e competidornan di e consola Xbox y e negoshi di subscripcion cu ta aumentando.
FTC su desafio por ta un test pa e mandato di President Joe Biden cu ta critica adkisicionnan grandi. E commission a vota 3-1 pa entrega e keho despues di un reunion priva, cu 3 comisario democratico votando na fabor y e unico republicano votando den contra.
E keho ta señala na adkisicionnan anterior di Microsoft, specialmente esun di e compania conoci Bethesda Softworks y su compania ZeniMax, como un ehempel unda cu Microsoft ta haciendo algun di e weganan binidero exclusivo pa Xbox apesar di a sigura e reguladornan Europeo cu nan no tabatin intencion di haci esaki.
“Microsoft ya caba a demostra cu nan por y nan lo retene contenido for di nan rivalnan,” segun un declaracion prepara di Holly Vedova, director di FTC su Bureau of Competition. “Awe, nos ta busca pa stop Microsoft di haya control riba un studio cu ta lider y independiente y usa esaki pa causa daño na competencia den varios mercado dinamico y cu ta creciendo rapidamente.”
FTC a bisa cu nan lo entrega un keho via e proceso administrativo na luga di hiba e caso corte federal. Esaki ta nifica cu un hues di ley administrativo lo lidia cu e caso.
Microsoft su president a señala den su declaracion diahuebs cu e compania ta hopi probabel di desafia FTC su decision. “Mientras cu nos ta kere den duna paz un chens, nos tin confiansa completo den nos caso y nos ta duna bon bini na cualkier oportunidad pa presenta nos caso den corte,” Smith a splica.
E compania a cuminsa mehora nan defensa publico di e trato den dianan reciente mirando cu nan ta wardando pa un decision. Smith a bisa cu Microsoft ta comprometi den trata e preocupacionnan di competencia y a haci varios proposicion na FTC anteriormente e luna aki. “Nos ta sigui kere cu e trato aki lo expande competencia y crea mas oportunidad pa personanan cu ta hunga wega y esunnan cu ta desaroya e weganan,” Smith a splica.
Microsoft a anuncia e trato aki den january pero a enfrenta lunanan di resistencia for di Sony, cual ta haci e consola di competencia PlayStation, y a trece dilanti preocupacion cu vigilantenan rond di mundo pa cu perde acceso na e franquisianan popular di Activision Blizzard.
Reguladornan bao Biden a “papia caba cu pa decadanan largo e politica di adkisicion ta hopi debil y nan a bisa varios biaha cu nan ‘ta cambiando esaki,’” segun William Kovacic, president anterior di FTC.
Esaki a pone presion riba FTC pa cumpli cu su promesanan pa “no permiti tratonan dudoso y no acepta acuerdonan debil,” segun Kovacic, ken tabata comisario Republicano den 2006. El a bisa cu apesar di tur cos, Microsoft tin un bon chens di gana e desafio legal aki.
“E ta evidente cu e compania tin tempo ta haci varios cambio,” el a splica. “Microsoft ta hopi probabel di trece esaki dilanti den corte y bisa cu FTC ta siendo hopi terco tocante e tema.”
Microsoft a anuncia su ultimo promesa diaranson, bisando cu nan lo haci Call of Duty disponiebl riba dispositivonan di Nintendo pa 10 aña si e adkiscion aki tuma luga y manera a bisa na comienso, nan a extende e oferta aki na Sony tambe.
