Algun aña atras, embaraso hubenil tabata un fenomeno cu tabata arasa ariba e isla. Hopi caso di embaraso hubenil tabata bin dilanti y esaki a causa un preocupacion grandi den comunidad. Isabella Eman, enfermera di Wit Gele Kruis den e departamento di mama hoben, a conta Bon Dia Aruba cu den e añanan recien por a mira un caida satisfactorio den e casonan di embaraso hubenil.
E grupo di enfoke ta hobennan entre 14 cu 20 aña edad. E bordamento ta concentra ariba prevencion di embaraso hubenil. Nan ta haci esaki a traves di charlanan na scol, nan ta ofrece anticonceptivo, prik pillen etc. pa preveni embaraso hubenil.
Eman a splica cu e departamento ta haci tambe bishita na cas pa hobennan cu ta mama caba pa asina guianan y alabes pa preveni un segundo embaraso. Nan ta yuda e mama hoben cu motiviacion pa bay school y con pa atende cu un baby mientras nan ta bay scol.
Nan ta informa e mamanan hoben tambe di e desaroyo di 0 pa 2 aña di un baby y nan ta promove pa e baby haya su vacunanan y e cuido necesario.
Segun estadisticanan di Wit Gele Kruis, na aña 2000 e casonan di embaraso hubenil tabata casi 200 caso pa aña y a conoce un aumento pa algun aña despues. Na 2021 e cifra aki tabata 45 locual ta demostra un caida significante. “Nos ta spera cu pa aña 2022 esaki por ta menos. Nos lo tin e cifranan di e aña aki na januari 2023”, Eman a indica.
Pa loke ta e expectativanan pa otro aña, Eman a comenta cu nan lo sigui cu e trabao di prevencion y tambe trabou curativo. “Si un hoben tin un yiu, OK ban haci lo miho cu por. Nos ta yuda e hoben cu e proceso di cria un baby, yud;e pa bay scol, cu su autoestima. Y pa e hobennan cu kier cuida nan mes pa no haya yiu nos lo sigui ofrece e servicionan di anticonceptivo.”
El a remarca cu nan lo continua tambe cu e charlanan na scol y nan ta ofrece charla tambe na otro luga-, institucion- y organisacionnan cu no ta scol. “Nos meta ta pa e informacion yega cerca e hobennan eyfo”, el a finalisa.
