Durante e evento ‘Topami na Mita’ cu a tuma luga diahuebs ultimo, cabesante di Abraham de Veer School tambe tabata presente y a splica e rol importante cu scol ta hunga den e bida di un mucha, efectonan malo di media y aparatonan electronico y e importancia di cooperacion entre mayornan scol.
Sra. Bueno-Guzman-Hooft a splica cu como scol nan t’ey pa traha y yuda e mucha- y hobennan hunto cu nan mayornan. E mayornan ta e ‘eerste lijn’ (prome liña) y si mayor semper avisa na scol, hunto nan por sigui traha cu e hobennan pa mehora cualkier situacion.
Pero el a remarca cu temponan a cambia hopi y den su 28 aña di experiencia den e trabou di educacion, el ta wak un cambio grandi. E cambio, segun el a indica, ta cu añanan atras por a mira mas un control social. Ora cu e mucha bay cas e tin por ta su mama ainda na cas of su wela, hasta bisawela, bisiña cu tabatin control ariba e muchanan
Pero aworaki tur cos ta completamente diferente. Aworaki mayornan tin cu traha, tin di nan hasta dos trabou of por ta hasta mas, pa logra cubri e gastonan di caso. Esey ta haci cu mayornan, no pasobra nan no kier pero door cu nan no por y no tin tempo, no tin e tempo pa ta cu nan yiunan y ya no tin e control ey mas.
“Esey ta e parti unda nos tin cu traha hunto cu mayornan pa asina mayornan ta mas consciente y ta mas responsabel cu nan yiunan. Nos ta compronde cu nan tin cu traha, pero e problema ta cu aworaki e mayornan kier educa nan yiunan, pero nan no ta educando nan yiunan manera debe ser y e ora media ta educando nan yiunan”, Bueno-Gizman-Hoof t a remarca.
El a enfatisa cu media, game station, playstation y tur tipo di weganan electronico ta educando mucha y hobennan y nan ta wordo inunda informacionnan bon y malo, pero hopi biaha malo, hasta fake news, y esey ta haci e ora ey cu e alumno ta cay den un ansiedad.
“Y nan no por biba sin e telefon. E telefon ta zorg cu nan tin un amigo, un persona cerca di nan pasobra nan ta sinti nan mes nan so, pero a pesar cu e telefon ta algo bon ora cu bo sa us’e, ora bo no us’e e ta por ta algo hopi dañino”, el a subraya.
El a indica cu si un hoben ainda no sa con pa usa un celular manera debe ser, mayornan mester ta consciente y no djis cumpra articulonan , pa asina e bashi cu e mayor kier yena pa motibo di no t’ey presente den e bida di su yiu wordo yena cu e telefon cu na final por causa daño.
“P’esey scol como un driehoek verhouding, nos ta traha cu mayor y alumno pa nos logra e miho pa nos muchanan. Kiermen mayornan acudi na e scol di bo yiu na momento cu bo ta den un situacion dificil. No keda keto pasobra scol tey tambe pa yuda unda cu por”, el a finalisa.
