Stichting Hunto ta un fundacion relativamente nobo cu a lanta den luna di october di e aña aki. Stichting Hunto ta un cooperacion entre instancianan SPD (Sociaal-psychiatrische Dienst) y FMAA (Fundacion pa Maneho di Adiccion Aruba) na unda lo maneha asuntonan di adiccion y ta trece cuido den e parti di loke ta psikiatria basico pa mucha y hoben.

Arthur Comenencia, director di Centro Colorado a splica den un entrevista pa Bon Dia Aruba cu den nan cifranan anual nan a tuma nota cu ayudo pa salud mental a subi drasticamente, loke ta e parti di depresion y ansiedad den hobennan. E parti di uso di substancianan manera por ehempel marihuana tambe a subi drasticamente pa motibo di Covid.

“E demanda ta hopi grandi y nos ta bezig ta ampliando e ayudo y pa e motibo ey a haci union pa ora e cliente yega cerca nos door di un sistema di triage e ta wordo yuda mas lihe den loke ta su necesidad. E ta wordo evalua si ta parti psikiatrico door di e psikiatra di mucha of di hende”, Comenencia a indica.

Pa loke ta trata e problema di adicto ambulante cu keto bay ta un problema grandi na Aruba el a splica cu desde Ministerio di Husticia a lanta un bemoeizorg – cuido di interferencia – cu ta consisti di un ekipo special cu ta bay cerca e adictonan, e clientenan, pa ofrece e ayudo y wak si nan ta acepta esaki.

Unabes nan acepta esaki nan ta bay inloophuis situa na Meiveld, conoci manera Samba den pueblo y e eynan e trayectoria ta cuminsa pa nan prepara pa rehabilitacion.

“Tin un team special cu tur dia ta subi caya bay papia cu e clientenan, pero e cliente ta esun cu mester dicidi di acepta e ayudo. Unabes nan acepta un team special ta hiba nan na e inloophuis caminda nan ta bay tur dia, haya nan cuminda y eynan e parti preparatorio ta cuminsa cu un psikiatra pa nan por drenta e centro di rehabilitacion”, Comenencia a splica.

Ainda tin algo di tabu ora cu ta trata e tema di salud mental y adiccion, pero poco poco esaki ta wordo elimina y a traves di charlanan Stichting Hunto ta yuda trece e team di salud mental y adiccion pa dilanti.

“Nos ta haya hopi yamada di scol, hopi yamada di companianan pa trece loke ta adiccion y salud mental pa dilanti. Adiccion y salud mental no por wordo separa for di otro. Psikiatria ta cay hunto cu loke ta adiccion. Y nos ta haya hopi yamada di scolnan, trabounan tambe pa trece informacion y sa e caminda unda nan tin cu cana pa nan haya e ayudo, pa e hendenan cu mester.”

Pa otro aña Stichting Hunto tin plannan hopi grandi, segun Comenencia a comenta. Nan ta trahando den e renobacion di un Centro Colorado mas moderno. El a splica cu nan tin tambe e edificio situa patras di Pius X School na Dakota unda lo bay tin un clinica specialisa pa duna tratamento pa mucha y hende grandi. E personanan ta yega eynna pa haya nan tratamento y si nan mester bay rehabilitacion, nan ta wordo manda Centro Colorado.

“Esey ta e plannan grandi cu Stichting Hunto tin. Tambe pa cambia e pensamento den comunidad den e parti di psikiatria y adiccion”, el a finalisa.