Directie Volksgezondheid Aruba (DVG) a anuncia nan campaña di vacunacion den bario contra influenza. E vacuna aki lo ta disponibel pa e grupo den comunidad cu ta na risico bira hopi malo debi na influenza. E grupo aki ta consisti di adulto mayor di 60 aña of mas y tambe di personanan menor di 60 aña pero cu ta sufri di un of mas malesa cronico.
Sra. Jurette Croes, vocero di DVG, a splica na algun medio local cu e bus di unidad mobil lo ta den diferente bario repartiendo e vacuna contra influenza. El a remarca cu e vacuna aki ta gratis pa tur persona cu tin 60 aña of mas. Loke nan mester haci pa ricibi e vacuna aki ta presenta cu nan carchi di AZV na e unidad mobil.
E vacuna tambe ta completamente gratis pa cuidadonan cu ta bao di 60 aña, pero cu ta sufri di algun condicion di salud cronico. Pa por ricibi e vacuna e personanan aki mester acudi cerca nan dokter di cas pa haya un receta y cu e receta aki nan por acudi na e unidad mobil of na DVG y nan lo ricibi e vacuna.
Pa cuidadonan bao di 60 aña y cu no tin un condicion di salud cronico, pero ta desea di ricibi e vacuna di influenza, tin un costo di 20 florin pa e vacuna. E personanan aki no por acudi na e unidad mobil pa ricibi e vacuna, nan mester haci un cita na Departamento di Salud Publico.
E ta un custumber caba cu tur aña DVG ta ofrece e vacuna di influenza. Temporada di fin di aña ta un temporada durante cual hopi hende ta bira malo.
Tur vacuna ta wordo duna na e edificio Dienst Besmettelijke Ziekte cu ta situa na e parti patras di Departamento di Salud Publico.
Orario di e unidad mobil ta di 08:00 pa 11:45 di mainta y 1:00 pa 3:30 di atardi. E unidad mobil lo t’ey presente na Centro Playa Pabou, Oranjestad dia 28 y 29 di november, Centro Deportivo Frans Figaroa na Noord dia 6, 7 y 8 di december, stadion Joe Laveist na San Nicolas dia 12, 13 y 14 di december y Centro Deportivo Betico Croes dia 19, 20 y 21 december
Pa mas informacion por bishita e pagina di Facebook di Departamento di Salud Publico.
